உங்கள் கேள்விகளை இங்கே பதிவு செய்யுங்கள்

From Blog.PKP.in

Thursday, July 31, 2008

ஐபோன் 3G சில நிறைகளும் குறைகளும்


ஐபோன் கைக்கு வந்து இன்றைக்கு ஒரு வாரம் ஆகிவிட்டது. ரொம்ப விளையாடவில்லை. USB கேபிள் கொடுத்திருக்கின்றார்கள்.எனினும் இதுவரை அதை கணிணியோடு இணைக்க வில்லை.வைரஸ் ஏதாவது வந்துவிடப்போகின்றது என்றாள் நேகா. எங்கிருந்தாலும் மெய்மறந்து யூடியூப் பார்ப்பதிலேயே சமயம் போகின்றது.3G அலைவரிசை உள்ள இடங்களில் வசிப்போருக்கு கொண்டாட்டம்தான்.(USA-ல் 3G வசதி உள்ள இடங்கள் Map இதோ).அதாவது எங்குபோயினும் அகலப்பட்டை வேகம் உங்கள் ஐபோனில் இருக்கும். 3G இல்லா இடங்களில் EDGE அலைவரிசை கிடைக்கலாம்.அது கொஞ்சம் வேகம் குறைவாய் இருக்கும். இருந்தாலும் அவ்வளவு மோசமாய் இல்லை.அப்பார்ட்மென்டில் இருக்கும் போது வீட்டு Wi-Fi-யை அது பிடித்துக்கொள்ளும். அப்படித்தான் நியூஜெர்சி மொகுலில் டின்னருக்காக போகும்போது காரின் சிடிகொத்தை மறந்துவிட்டோம். தமிழிசை இன்றி போரடித்தது. கோபாலுக்கு பட்டென ஒரு யோசனை. காரின் Ipod அடாப்டரிலேயே iPhone -ஐ செருகி நாங்கள் விரும்பி கேட்கும் தமிழ் பாடல்களை யூடியுபில் லைவாக ஓடவிட்டு DJ ஆனாள் நேகா. ஆமாம் விரல் நுனியில் உலகம்.


3G தொழில் நுட்பம் நம்மை பெரிதும் மாற்றிவிடும் போலிருக்கின்றது. இந்தியாவில் அடுத்த மாதம் வோடாபோனும் ஏர்டெல்லும் ஐபோனை அறிமுகப்படுத்துகின்றதாம். ஆனால் முக்கியமான அந்த 3G அலைவரிசை இந்தியாவில் வர இன்னும் கொஞ்ச நாள்பிடிக்கும். எப்போதோ வந்திருக்க வேண்டியது. பாதுகாப்பு அது இதுவென கூறி நம் அமைச்சர்கள் அதை தள்ளிப் போட்டுக்கொண்டே வந்திருக்கின்றார்கள்.

ஐபோன் 3G சில நிறைவுகளும் குறைபாடுகளும்.

நிறைவுகள்.

  • மட மட வென அதிவேக இணையம்.
  • யூடியூப் வீடியோக்கள் அட்டகாசமாய் ஓடுகின்றன.
  • விரல் நுனியில் பங்கு நிலவரங்கள் மற்றும் வானிலை நிலவரங்கள்.
  • Pdf கோப்புகளை படிக்க முடிகின்றது.
  • Word Doc கோப்புகளை படிக்க முடிகின்றது.
  • கேமரா உதவியால் நல்ல துல்லிபமான டிஜிட்டல் படங்களை எடுக்கமுடிகின்றது.அப்படியே ஆன் த ஸ்பாட்டில் மின்னஞ்சலும் செய்துவிடலாம்.
  • விமானம் ஏறியதும் வயர்லெஸ் வசதியை மட்டும் அணைக்கும் வசதி.
  • ஸ்கிரீன் ஷாட் எடுக்கும் வசதி.
  • கான்ஃபெரன்ஸ் கால் செய்யும் வசதி.
  • புளூடூத் மற்றும் விபிஎன் வசதிகள்.
  • எரிச்சலூட்டும் No booting time, No logon time
  • அதனால் Instant email checkup, Instant Browsing, Instant Youtube
  • பல்வேறு பலரும் உருவாக்கிய இலவச ஐபோன் பயன்பாடுகள் (Updated)
குறைபாடுகள்.
  • தமிழ் யூனிக்கோடு எழுத்துருக்கள் உடைந்து உடைந்து தெரிகின்றன(படம்).Safari உலாவியிலிருக்கும் Iphone emulator பொய் சொல்லுகின்றது நெஜமாலுமே.
  • கேமராவில் ஸூம் வசதியில்லை (ரொம்பவும் ஆசைதான்).
  • அவுட் ஆப் பாக்ஸ் ஐபோனில் வீடியோ பதிவு செய்யும் வசதியில்லை. ஆனால் அது ஏற்கனவே ஹேக்கப்பட்டு ஐபோனுக்கான வீடியோ ரெக்கார்டிங் மென்பொருள்கள் இணையத்தில் கிடைக்கின்றன.
  • GPS நீங்கள் இருக்கும் இடத்தை காட்டுகின்றது, போக வேண்டிய இடத்துக்கான turn by turn direction-ம் கொடுக்கின்றது. ஆனால் சாதாரண ஜிபிஎஸ் போல் குரல் வழி வழிநடத்தும் வசதியில்லை. இதுவும் மென்பொருள் சமாச்சாரமாகையால் எளிதில் மாற்றப்பட்டுவிடலாம்.
  • கூகிள் வீடியோக்களை பார்க்க சில தந்திரங்களை மேற்கொள்ள வேண்டியிருக்கின்றது.
  • AT&T-யை பொறுத்தவரை, ஐபோனை மோடமாக பயன்படுத்தி லேப்டாப்பில் இணையம் மேய முடிந்தால் கூட நாம் அதை செய்யக் கூடாதாம்.
  • Flash நுட்ப வசதியில்லை.(Updated)

கையடக்க இந்த ஐபோன் பலருக்கும் ஒரு கியூட் கேட்ஜெட். இதுவே சற்று பெரிதாக சிறு புத்தக வடிவில் கீபோர்டு டைப்ப ரொம்ப கஷ்டப்படாத வகையில் ஒரு கேட்ஜெட் வந்தால் நன்றாயிருக்கும் என்பது பலரின் அவா. அதாவது சற்று பெரிய தட்டையான ஐபோன். ஆப்பிள் நிறுவனம் ரகசியமாய் அதற்கான புரோட்டோடைப்பில் ஈடுபட்டிருப்பது போல் தெரிகின்றது. ஐடேப்ளட் (iTablet) என்றோ அல்லது வேறெதாவது பெயரிலோ இந்த வருட இறுதிக்குள் அது சந்தைக்கு வரலாம்.

ஆப்பிள் காட்டில் மழைதான்.

குரான் தமிழ் மொழிபெயர்ப்பு இங்கே சிறு மென் புத்தகமாக. Quran Tamil Translation pdf ebook Download. Right click and Save.Download


Email PostDownload this post as PDF

Monday, July 28, 2008

கண் இமைக்கும் நேரத்தில் களவு

கரன்சி நோட்டில் கைபடாமலேயே நம்மால் வாழ முடிகின்றது. என்ன வாரறுதியில் லாண்டரி மெசினில் போட மட்டும் சில குவாட்டர்களை தொடுகின்றோம். மற்றபடி அனைத்து லவ்கீகங்களுக்கும் கிரெடிட்கார்டு தான் பதில்.வங்கிச்சேமிப்பு கணக்குகளில் எண்கள் கொஞ்சம் ஏறினால் இரண்டு மடங்கு இறங்குகின்றன. அந்த எண்களில் தான் நம் நாட்களும் ஓடிக்கொண்டிருக்கின்றன. இன்றைக்கும் உலகில் இருக்கும் அத்தனை டாலர்களையும் காகிதமாக்க அமேசான் காடு கூட பத்தாது.நல்ல வேளையாய் சரியான வேளையில் சரியான தொழில்நுட்பங்கள் மனிதனுக்கு வாய்த்துவிடுகின்றது. பணவீக்கமாயினும் அதை சுமக்காமல் அட்டைவழி பிழைத்துப் போய்க் கொண்டிருக்கின்றான்.

இப்படி கடனட்டை நம் வாழ்க்கையை சிறிது எளிதாக்கியிருக்க அடுத்தமுறை உங்கள் கடனட்டையை பயன்படுத்தும் போது கொஞ்சம் உஷாராயிருங்கள் என்கின்றனர் மும்பை போலீசார். நீங்கள் உங்கள் கடனட்டையை அந்த டைகட்டின ஆசாமியிடம் கொடுத்துவிட்டு அரக்க பரக்க பார்த்துக்கொண்டிருக்க அந்த ஆசாமியோ பில் போடுவதோடு தன்னிடம் மறைத்து வைத்துள்ள தன் சொந்த Portable Magnetic Card Reader-ரிலும் ஒரு தேய்ப்பு தேய்த்து விடுகின்றான்.(படம்) அந்த ரீடர் கணப்பொழுதில் உங்கள் கிரெடிட்கார்டை படித்து அதிலுள்ள தகவல்களை மனப்பாடம் செய்துவைத்துக்கொள்ளும். இந்த ஆசாமி அத்தகவல்களை பின் வீட்டில் போய் தன் கணிணி வழி படித்து, அச்சு அசலாய் உங்கள் கிரெடிட் கார்டு போலவே இன்னொரு போலி கிரெடிட்கார்டை தயாரிக்கலாமாம். சந்தைகளில் பயன்படுத்தலாமாம். கதை எப்படி இருக்கு? இப்படி குறுக்குவழியில் பணம் சம்பாதிக்க ஆசைப்பட்டு மாட்டிக்கொண்ட ஒரு கணிணி இஞ்சினியர்கள் கும்பல் மும்பையில் சமீபத்தில் பிடிபட்டுள்ளதாக சொல்கின்றார்கள். கண்ணை மூடிக்கொண்ட பூனைபோல ரொம்ப பேரின் நினைப்பு இதுமாதிரி ஹாக்கிங் செய்தால் எளிதாய் தப்பித்திடலாம் மாட்டிக்கொள்ளமாட்டோம் என்பதாகும்.தவறு நண்பரே மிக மிகத் தவறு. சரியான புரிதல்வேண்டும். ஒருவேளை அதற்கு நீங்கள் ரஷ்யா போன்ற இரும்பு தேசத்தில் இருந்தால் சாத்தியமாகலாமாயிருக்கும்.

ஸோ ஷெரேட்டனோ பார்க் இன்னோ,வால்மார்ட்டோ மெக்டானல்சோ உங்கள் கடனட்டையை அடுத்தமுறை கடைக்காரரிடம் தேய்க்க கொடுக்கும் போது அந்த கார்டிலேயே ஒரு கண் இருக்கட்டும். கண் இமைக்கும் நேரத்தில் நீங்கள் களவாடப்படலாம்.ஜாக்கிரதை.

தகவலுக்கு நன்றி:M.Rishan Shareef

ஸ்ரீ ஸாயி ஸத் சரித்திரம் அல்லது ஸ்ரீ சீர்டி ஸாயிபாபாவின் அற்புத வாழ்க்கையும் உபதேசங்களும் இங்கே தமிழில் சிறு மென் புத்தகமாக. Shri Shirdi Sai Baba life history in Tamil pdf ebook Download. Right click and Save.Download


Email PostDownload this post as PDF

Sunday, July 27, 2008

என் கம்ப்யூட்டிங்

நமது வீடுகளிலுள்ள கணிணிகளையும் சரி அல்லது பெரிய கார்ப்பரேட்டுகளின் செர்வர்களையும் சரி நாம் என்றைக்குமே முழுசாய் பயன்படுத்தியதில்லை. பெரும்பாலான செர்வர் அநேகமாய் எப்போதுமே சும்மாய்தான் இருக்கின்றனவாம். அப்பப்போ வரும் ஒரு சில கோரிக்கைகளை நிறைவுசெய்வதோடு சரி. இப்படி கொள்ளைகணக்கில் கணிணிதிறன் அதனைச் சார்ந்து மின்சாரம் இடம் பணம் பராமரிப்புச் செலவு என அநேக ஐஸ்வர்யங்கள் விரயமாவதால் இன்றைக்கு "ஒரே கணிணியில் பல செர்வர்களையும்" ஓட வைக்கும் விர்சுவலைசேஷன் மற்றும் SAN தொழில்நுட்பங்கள் பிரபலம். நம் வீடுகளிலும் இதைக் கொண்டுவரலாமா? மிச்சம் பிடிக்கலாமா?

உங்களிடமுள்ளதோ ஒரே ஒரு கணிணி. அது ஒரு நல்ல லேட்டஸ்ட் கணிணி என வைத்துக்கொள்வோம் . ஆனால் அதில் விளையாட ஒரே நேரத்தில் மூன்று பொடிசுகளும் போட்டிபோட்டு சண்டையிடுகின்றனர். என்னப் பண்ணுவது?. ஒருவேளை உங்களுக்கு ஒரு கணிணியை பலரும் பயன்படுத்த உதவும் இந்த NComputing தொழில் நுட்பம் உதவலாம். இவர்கள் கொடுக்கும் "X300" என்ற டப்பாக்கள் வழி ஒரே கணிணியை மூன்று மானிட்டர்கள் மூன்று கீபோர்டுகள் வழி மூன்று பொடிசுகளும் ஒரே நேரத்தில் பயன்படுத்த வழி செய்யலாம்.என்ன ஒரு கணிணி வாங்கப் போனால் $500 செலவாகும் இந்த டப்பாக்கள் $73-க்கு கிடைக்கின்றது. ஆனால் ஒரு சின்ன கன்டிசன். எல்லா பயனர்களும் கொஞ்சம் பக்கம் பக்கத்தில் இருக்க வேண்டும்.

நம் ஊர் வீடுகள், பள்ளிகள், சிறு அலுவலகங்கள், பயிற்சி மையங்களுக்கு ஏற்ற சிக்கனமான ஒரு நல்ல தீர்வு. இந்தியாவில் இதற்கான சந்தை பிரகாசமாய் இருப்பதால் இங்கு NComputing டப்பாக்களை முழுவீச்சில் இறக்கிவிட்டிருக்கின்றார்கள். அடுத்தமுறை இதுமாதிரி ஒரு தீர்வு யாருக்காவது தேவைப்பட்டால் என்கம்யூட்டிங்கை அறிமுகப்படுத்திவிடுங்கள். புண்ணியமாய்ப் போகும்.
http://www.ncomputing.com

"காதலெனும் சோலையிலே" தமிழ் புதினம் இங்கே தமிழில் மென் புத்தகமாக. Kaathalenum Cholayiley Novel in Tamil pdf ebook Download. Right click and Save.Download


Email PostDownload this post as PDF

Friday, July 25, 2008

சும்மா லைவ்லி

இணையதள புராஜெக்ட்கள் இப்போதெல்லாம் சினிமாப்படம் எடுப்பதுபோலாகிவிட்டது. அமர்க்களமாக வெளியாகும் சில இணையதள சேவைகள் பொசுக்கென போய் விடுவதுண்டு. சேது போல கமுக்கமாக வெளியாகும் சில இணையதளங்கள் சூப்பர் ஹிட்டான கதைகளும் உண்டு. எது ஹிட்டாகும் எது ஃபிளாப்பாகும் என கணிப்பது கஷ்டமாகிக் கொண்டிருக்கிறது. ஷங்கர் போல் ஒவ்வொரு படத்துக்கும் புதுசு புதுசா டைரக்டர்களை கண்டுபிடித்து போட்டால் அந்த வேலை எளிதாகும் போலும்.

பள்ளிகளில் வாரத்துக்கு ஒரு வகுப்பு சும்மா இருப்போம். தோட்டங்களில் கொத்திக்கொண்டோ அல்லது வண்ண நூலிழைகளை நெய்து கொண்டோ அல்லது மரப்பெட்டிகளை தட்டிக் கொண்டோ சும்மா இருப்போம். அது போலவே கூகிளில் பணியாற்றுபவர்களுக்கும் வாரத்துக்கு 20% நேரம் வேலையல்லாமல் சும்மா வேறே எதாவது செய்ய அனுமதி கொடுக்கின்றார்கள். அப்படி கூகிளில் யாரோ ஒரு ஐயா சும்மா இருந்த போது தட்டி தட்டி உருபெற்றது தான் இன்றைக்கு சூப்பர் ஹிட்டாக இருக்கும் ஆர்குட்.

இப்போதும் அது போலவே கூகிளிலிருந்து யாரோ ஒரு அம்மா சும்மா இருந்த நேரத்தில் உருவாக்கிய இன்னொரு புராஜெக்ட்டை கூகிள் வெளியிட்டுள்ளது. அதன் பெயர் லைவ்லி.

http://www.lively.com

நம் வலைப்பக்கத்தில் நாம் நிறுவியுள்ள வண்ணமயமான விர்சுவல் 3D அறையில் நான் அதாவது என் அவதார் இருந்து டிவி பார்த்துக்கொண்டிருக்க (அதில் யூடியூப் வீடியோக்கள் ஓடிக்கொண்டிருக்கும்) நீங்கள்,அதாவது உங்கள் அவதார் ஹாய் சொல்லிக்கொண்டே உள்ளே நுழைய விர்ச்சுவலாய் காஃபி சாப்பிட்டுக்கொண்டே நாம் ஊர் கதை உலகக் கதை சாட் செய்யலாம். அப்படியே ஆர்வமுள்ள நண்பர்களும் அவர்கள் அவதாராய் உள்ளே நுழைந்து நம்முடன் கதைக்கலாம். கத்தலாம். சண்டைபோடலாம். எல்லாமே விர்சுவலாக. பாதுகாப்பாக.இது தான் லைவ்லியின் சாராம்சம். Secondlife.com க்கு போட்டி என்கின்றார்கள்.

இதுபோன்ற சிறுபிள்ளைத்தனமான ஒரு கார்டூன் புராஜெக்ட்டை அறிவுஜீவி கூகிள் அறிமுகப்படுத்துவது பலருக்கும் ஆச்சர்யமே.என்ன நோக்கோடு அது இதை அறிமுகப் படுத்தியிருக்கின்றது என்பது மர்மம் தான். அதில் மறைந்திருக்கும் வியாபார யுத்தி யாருக்குத் தெரியும். விர்ச்சுவல் அறையில் இன்றைக்கு இலவசமாய் கிடைக்கும் டிவி, பர்னிச்சர்கள் மற்றும் என் அவதார் அணிந்திருக்கும் பிராண்டட் ரிபோக் ஷூ எதிர்காலத்தில் இலவசமாய் கிடைக்காமல் போகலாம்.அந்த விர்சுவல் உலகில் உலாவரும் யுவதிகளை கவர பைத்திய உலகம் அவைகளை காசு கொடுத்து வாங்கவும் தயங்காது. அப்படியே அந்த விர்சுவல் உலகின் சுவர்களிலும், என் அவதாரின் டீ சர்ட்டிலும் அட்சென்ஸ் விளம்பரம் இருக்கலாம்.இப்படி காசு உண்டாக்க பல யுத்திகள் நம் கூகிளுக்கு அப்போது உருவரும். இப்போதைக்கு அங்கு கூட்டம் சேர்ப்பதுதான் அதன் பிரதானப் பணி.

லைவ்லியில் நான் பார்த்ததில் விர்சுவல் படுக்கையறை கூட உருவாக்கலாமாம். அப்படியே விர்சுவலாக "அது" செய்யவும் அனுமதி தந்தால் கூட்டம் கூடத்தான் செய்யும் பணம் கொட்டத்தான் செய்யும்.

தகவலுக்கு நன்றி Mohamed IQbal

கொசுறு தகவல்:
செய்திகள் நிறைந்த Google News பக்கம் இப்போது தமிழிலும் அறிமுகப்படுத்தப்பட்டுள்ளது. கீழ்கண்ட சுட்டியை சொடுக்கி பார்க்கவும்.
http://news.google.com/news?ned=ta_in

இரமணிச்சந்திரன் அவர்களின் "நின்னையே ரதி என்று" எனும் புதினம் இங்கே தமிழில் சிறு மென் புத்தகமாக. Ramani Chandran Ninaiye Rathi Endru Tamil Novel pdf ebook Download. Right click and Save.Download


Email PostDownload this post as PDF

Tuesday, July 22, 2008

ஹாய்போன்

ஐபோன் 3ஜி சந்தைக்கு வந்த வெள்ளி மறுநாளே நேகா ஒரு AT&T கடையைத் தேடிப்போய் தனக்கென ஒரு ஐபோனை முன்பதிவு செய்து வந்திருந்தாள். ஆப்பிள் நிறுவனத்திலிருந்து அந்த AT&T ஸ்டோருக்கு அவள் ஐபோன் வந்து சேர அதிக பட்சமாக இரண்டு வாரங்கள் ஆகும் என சொல்லியிருந்தார்கள். அன்றையிலிருந்தே மிக ஆர்வமாக காத்திருந்தாள் நேகா. இன்றைக்கு காலையில் பெடக்ஸ்(Fedex) வண்டியில் டெலிவரிக்காக அவள் ஐபோன் காத்திருப்பதாக அவர்கள் டிராக்கிங் சொல்லிற்று. கொஞ்ச நேரத்திலெல்லாம் AT&T கடையிலிருந்தே அவளுக்கு அழைப்பு வந்தது."உங்கள் ஐபோன் ரெடி மேடம்".

நேகாவின் டொயாட்டோ கேம்ரியில் கும்பலாய் இன்று மாலையில் கிளம்பினோம். அக்கம்பக்கம் AT&T களில் இல்லாமல் எங்கோ கொஞ்ச தூரத்திலிருந்த அந்த குறிப்பிட்ட iPhone 3G உள்ள AT&T ஸ்டோருக்கு செல்லவேண்டியிருந்தது. முன்கண்ணாடியில் அழுத்தி மாட்டியிருந்த கார்மின் ஜிபிஎஸ்(GPS) வேறு வழிகாட்டுவதை விட்டு விட்டு அவ்வப்போது டமால் டமால் என கீழே விழுந்து எரிச்சலூட்டிக்கொண்டிருந்தது. இது மாதிரி கண்ணாடியில் அழுத்தி மாட்டும் ஜிபிஎஸ்களில் இது ஒரு தொல்லை. அதுவும் இது கோடைகாலமாகையால் வெயிலில் காய்ந்து சீக்கிரமாய் பொத்பொத்தென விழுந்துவிடுகின்றது. கோபால் ஒரு ஐடியா சொன்னான். அந்த ஜிபிஎஸ்சின் கண்ணாடியில் ஒட்டும் பகுதியில் சிறிது தண்ணீர் தடவினால்
சிக்-கென ஒட்டிக்கொள்ளுமென. அப்படியே செய்தோம். அப்புறம் அந்த ஜிபிஎஸ் கீழே விழவே இல்லை.

8GB ஐபோன்3G-யின் விலை 199 டாலர்கள்
அப்புறம் 18 டாலர்கள் ஒருமுறை ஆக்டிவேசன் கட்டணமாக
அப்புறமாக வழக்கமான செல்போன் பில் கூட மாதம் தோறும் 30 டாலர்கள் எக்ஸ்ட்ராவாக டேட்டா பிளான்காக கட்டவேண்டும் - இது தான் ஒரு ஐபோன் வைத்திருக்கும் நேகாவுக்கு ஆகும் செலவுகள்.

ரோல் ஓவராகி சேர்த்து வைத்திருந்த நிமிடங்களெல்லாம் பிளான் அப்கிரேடு செய்ததில் போய் விட்டதில் அவளுக்கு சிறிது வருத்தமே.

மற்றபடி ஐபோன் ஒரு கூலான கைக்கணியாய் இருக்கின்றது. ஒரு துரிதப் பார்வையிட்டதில் கலக்கலாய் இருந்தது. உடனே அக்கம் பக்க Wi-Fi க்களை கண்டுபிடித்து அத்துடன் இணையட்டுமாவென கேட்கின்றது.அப்படி இணைந்தால் நல்ல வேகமான தகவல் பாய்வு கிடைப்பதால் வலை மேய்தல் மிக வேகமாக இருக்கின்றது. யூடியூப் வீடியோக்களை, உங்கள் போட்டோக்களை அப்படியே கிரிஸ்டல் கிளியராய் பார்க்க முடிகின்றது. MP3 பாடல்களை இறக்கம் செய்யாமலே கேட்க முடிகின்றது. தமிழ் பிடிஎப்-களையும் படிக்க முடிகின்றது. ஆனாலும் தமிழ் யூனிக்கோடு தளங்கள் இப்போதைக்கு அரைகுறையாய் தான் தெரிகின்றது. இன்னும் சில ஆய்வுகள் மேற்கொள்ள வேண்டும்.

அவ்வப்போது அதை அவளிடம் சுட்டு நான் கற்றவற்றை உங்களுக்கும் சொல்வேன்.

அமெரிக்காவில் நீங்கள் வேலை செய்யும் கம்பெனி அல்லது படிக்கும் கல்லூரியைப் பொறுத்து உங்களுக்கு AT&T செல்போன் பில்லில் கொஞ்சம் தள்ளுபடி கிடைக்க வாய்ப்பு இருக்கின்றது.கீழ்கண்ட சுட்டிபோய் உங்கள் மின்னஞ்சல் முகவரியை கொடுத்துபாருங்கள்.
Get Additional Savings through Your Employer or School!
https://www.wireless.att.com/business/authenticate/

சேரன் "உயிர் கொல்லும் வார்த்தைகள்" கட்டுரைகள் தொகுப்பு இங்கே தமிழில் சிறு மென் புத்தகமாக. Cheran Yuir Kollum Vaarthaigal in Tamil pdf ebook Download. Right click and Save.Download


Email PostDownload this post as PDF

Monday, July 21, 2008

சுட்டெரிக்கும் பட்ஜெட்

வீட்டை விட்டு வெளியேறவே தயக்கமாயிருக்கின்றது. சுட்டெரிக்கும் வெயில் ஒரு பக்கமென்றால் சாதாரணப் பொருட்களெனின் விலையேற்றம் இன்னொரு பக்கம் சாமானியர்களை பொசுக்கியெடுக்கின்றது. எகிறும் கச்சா எண்ணை விலை, பணவீக்கம், விலைவாசி உயர்வு, உலகமயமாக்கல் இப்படி பிண்ணிப் பிணைந்துகிடக்கும் பொருளாதார கேயாசின் மத்தியில், மத்தியையோ மாநிலத்தையோ பார்க்க பரிதாபமாய் தான் இருக்கின்றது. செலவுகூடக்கூட வரவு குறையக் குறைய பலருக்கும் மாத வரவுசெலவு சமன்பாடு முட்டுகின்றது. இதுவரை வாரம் 40 மணிநேரத்திற்கு சம்பளம் கொடுத்த கம்பெனிகள் சில இனிமேல் 35 மணிநேரம் தான் சம்பளம் கொடுப்போம் என்கின்றனராம். கோபால் சோகமாய் இருந்தான்.சூப்பர் ஹிட்டான Dark Knight-கூட பார்க்க வரவில்லை. மிச்சம் பிடிக்க போகின்றானாம். கேட்டால் சேமிப்பும் ஒருவித வருவாயே என லெட்சர் அடிப்பான். அமெரிக்க "சாப்ட்வேர் கோபால்கள்" இப்படி சிக்கலில் தான் இருக்கின்றனர். சந்தோசப்படுபவர்கள் படலாம். இந்திய கோபால்களும் இதில் விதிவிலக்கல்ல.

வீட்டு வரவு செலவு கணக்கை பராமரிக்க ஒரு நல்ல இலவச மென்பொருளை வழங்குங்களேன் என பலரும் பலமுறை கேட்டதால் இங்கு ஒரு மென்பொருளை அறிமுகப்படுத்த விரும்புகின்றேன். இது ஆகக்கூடி ஒரு மென்பொருள்கூட அல்ல. இது ஒரு எக்செல் சீட். அருமையாக இருக்கின்றது. மாதா மாதம் உங்கள் வரவு செலவுகளை புள்ளிவிவரம் மற்றும் வரைபடங்களோடு உங்களுக்கு விளக்கிக் காட்டும்.எதில் அதிகம் செலவு செய்கின்றீர்கள், உங்கள் பட்ஜெட்டில் எங்கு ஓட்டை உள்ளது என இது அழகாக படம் பிடித்துக்காட்டும். மிக எளிய இந்த கோப்பு நிச்சயம் உங்களைக் கவரும்.

Download
Personal Budget Planner.xls (Right click and save)

அதையும் தாண்டி இல்லை, ஒரு மென்பொருள்தான் வேண்டும் என அடம்பிடிப்பீராயின் நம்ம ஊர் மதன் கனகவேலின் (Madhan Kanagavel, CodeLathe, LLC) இலவச ஓப்பன் சோர்ஸ் மென்பொருளான Money Manager EX-யை முயன்று பார்க்கலாம்.

Download
http://www.codelathe.com

ஜேம்ஸ் பாண்ட் துப்பறியும் "ரத்தக்காட்டேறி" தமிழ் காமிக்ஸ் படக்கதை இங்கே சிறு மென் புத்தகமாக. James Bond Raththak Kaatteri Tamil Comics pdf ebook Download. Right click and Save.Download


Email PostDownload this post as PDF

Thursday, July 17, 2008

ஆசியாவின் சூப்பர் கணிணி

முன்பெல்லாம் கணிணி பொட்டிக்குள் ஒரே ஒரு CPU மட்டுமே இருக்கும். அப்புறமாய் ஒன்றுக்கு இரண்டு சிபியூக்களை உள்ளே வைத்து அதை Dual-processor அல்லது two-way SMP என்றார்கள். பொதுவாக இப்படி ஒன்றுக்கு மேற்பட்ட சிபியூக்களை கணிப்பொறிகளில் பயன்படுத்துதல் செர்வர்களிலேயே வழக்கமாக இருந்து வந்தது. நாம் அப்படி என்ன பண்ணி கிழிக்கிறோமோ தெரியவில்லை, நாளுக்கு நாள் கணிணித்திறன் நமக்குகூட அதிகமாக தேவைப் பட்டுக் கொண்டே வருகின்றது. அதனால்தான் இன்றைய வீட்டுக்கணிணிகள் கூட ஒன்றுக்கு இரண்டு சிபியூக்களை கொண்டு வருகின்றன. ஆனாலும் இரண்டு தனித்தனி சிபியு சிப்புகளாய் இல்லாமல் ஒரே சிப்பில் இரண்டு சிபியூக்களும் அமர்ந்திருக்கும் வகையாய் வருகின்றன. இதைத் தான் டுவல்கோர் (Dual core) என்கின்றோம். பெரும்பாலும் Multithreaded பயன்பாடுகளே இதன் பலனை நமக்களிப்பதால் அதிக வித்தியாசம் ஒன்றும் நமக்கு தெரிவதில்லை. மற்றபடி வெறுமனே பிரவுஸ் செய்து சாட் செய்ய Quad core தான் (4 சிபியூ கோர்கள்) வேண்டுமென நாம் அடம்பிடித்தல் கொஞ்சம் ஓவர் தான்.

28 TB நினைவகத்தோடு கூடிய 14400 கோர்கள் உள்ள ஒரு கணிணி பற்றி கேள்விப் பட்டிருக்கின்றீர்களா? நம் ஊரின் சூப்பர் கம்யூட்டர்தாங்க அது. அதன் பெயர் EKA. புனேயிலுள்ளது. Tata Sons Limited-ன் Computational Research Laboratories-க்கு சொந்தமானது. இதிலுள்ள மின்சார கேபிள்கள் மட்டுமே 10கிமீ தூரத்துக்கு வருமாம். இது ஆசியாவின் சக்திவாய்ந்த முதல் சூப்பர்கணிணியாகும். உலக அளவில் இதற்கு நான்காவது இடம். யாகூ தனது cloud computing ஆய்வுக்கு இதை பயன்படுத்த திட்டமிட்டுள்ளதாக தெரிகின்றது.

இவ்ளோ பெரிய கணிணியில் ஓடும் ஆப்பரேட்டிங் சிஸ்டம் என்னவென நினைக்கின்றீர்கள்?
அட நம்ம லினக்ஸ் தான்.
http://www.crlindia.com

லினக்ஸ் பயிற்சி பக்கங்கள் தமிழில். Linux Payirchikal in Tamil pdf ebook Download. Right click and Save.Download


Email PostDownload this post as PDF

Wednesday, July 16, 2008

மிஸ்டர் இடியட்

இது மாதிரி அமைதியாய் ஒரு மூலையில் உட்கார்ந்து பரிமளா செல்போனில் பேசியதை நான் பார்த்ததேயில்லை. பொதுவாகவே அவள் பேசுவது அத்தனை பேருக்கும் கேட்கும். அடக்கிவாசிப்போமே என்றெல்லாம் இல்லை. யார் யாரெல்லாம் அவள் நண்பர்கள், எங்கெங்கு சேர்ந்து போனார்கள், எந்தெந்த ரெஸ்டாரென்ட்களில் என்ன என்ன சாப்பிட்டார்கள் எல்லாவற்றையும் எங்களிடம் அடுக்கிவிடுவாள். ஆனாலும் மறைக்கவேண்டும் என அவள் நினைத்தால் ஒரு காரியமும் அவளிடமிருந்து அறியமுடியாது.படபடவென கிளம்பி எங்கோ போவாள் மூன்றுமணிநேரம் கழித்து திரும்பிவருவாள். ஒரு பொட்டு விஷயமும் வெளியே தெரிய வராது.

இன்றைக்கும் அப்படித்தான் செல்போனில் யாரோடோ ஏதோ பேசி கிசு கிசுத்துக் கொண்டேயிருந்தாள். அவ்வளவு சந்தோசமாயில்லை. அவ்வப்போது பெருமூச்சு வேறு. எங்களுக்கோ கஷ்டமாயிருந்தது. என்ன பிரச்சனை இவளுக்கு? சரியான லூஸூ. நம்மிடம் சொல்வாளா? சொல்லமாட்டாளா? Iron man இரண்டாவது தடவையாக பார்த்துக் கொண்டிருந்தோம்.

கொஞ்ச நேரத்தில் எழுந்து வந்தாள்.
"யூ guys ஆர் இடியட்ஸ்" என்றாள், இன்னுமொரு பெருமுச்சு இழுத்துவிட்டவாறு.
எங்களுக்கு ஒன்றுமே புரியவில்லை.

பேச ஆரம்பித்தாள், "யூ நோ நேகா.அவள் பிரண்ட் கயல்,சவுத் இண்டியன் பொண்ணு.போன வருசம் தான் மேரேஜ் ஆச்சி. அரேஞ்ச்ட் மேரேஜ். கல்யாணமானதுமே இங்க ஃபில்லுக்கு (Philadelphia) அவள் மாப்பிள்ளை கூட்டியாந்துட்டான். கயல் கொஞ்சம் கருப்பு. ஆனா அழகா இருப்பா. இந்த நாய்க்கு அவளை பிடிக்கலனா அங்க அவன் தாத்தா அடம்பிடிச்சப்பவே சொல்லியிருக்க வேண்டியது தானே. இங்க தெனம் டார்ச்சர். கயல் வீக்கெண்ட் வந்தாலே பயமா இருக்குங்குரா. பார்ட்டி கீர்ட்டினு எல்லா வீக்கெண்டும் யாராவது கூப்புடுறாங்களாம். அங்க வர்றதுங்கல்லாம் செக்க செவேல்னு கொழு கொழுனு இருக்குதுக. இவா கருப்பா இருக்கதுனால....."

எங்களுக்கு விஷயம் புரிய ஆரம்பித்தது.
எந்த மாதிரியெல்லாம் உலகத்தில் பிரச்சனைகள்.

தினமும் சண்டை. வாக்குவாதம். அழுகை. நிம்மதியில்லை. தெரு தெருவாய் அமெரிக்க வீதிகளிலே அழுதுகொண்டே அவள் அலைந்திருக்கின்றாள். இதுமாதிரி சில நண்பிகளிடம் போனில் பேசி தன் சுமையை கொட்டி சிறிது நிம்மதி தேடியிருக்கின்றாள். இத்தனைக்கும் கயல் நன்கு படித்து வேலைக்கு போய் வரும் பெண். அவளின் நிலமையே இப்படி.

பலவருடங்களுக்கு முன்பு படித்த ஹம்சா தன கோபால் அவர்களின் "நீ என் உயிர் தேன்" என்ற புதினத்தில் வரும் நாயகி லதா நினைவுக்கு வந்தாள். மெரினா கடற்கரையில் அவள் தன்னை பிரிய விழையும் காதலனை பார்த்து ஆவேசமாய் கேட்பாள்."நல்ல பையனாப் பாரு, கெட்டப் பையனாப் பாருன்னு சொல்ல நீங்க யாரு நீங்க பெரிய மகானா.., கால்ல வந்து தட்டுப் படறதாலே இந்த கோமேதக கல்லோட அருமை உங்களுக்குத் தெரியலை, தெரியற காலம் வரும் மிஸ்டர் தியாகராசன்" என்பாள் வீராப்பாக.

பரி சொன்னமாதிரியே எனக்கும் சந்தேகம் வந்துவிட்டது "ஆர் வி ரியலி இடியட்ஸ்?"

"கடவுள் யாருக்குச் சொந்தம்" ஒரு ஆன்மீக மென் புத்தகம். Kadavul yaarukku sontham a religious book in Tamil pdf ebook Download. Right click and Save.Download


Email PostDownload this post as PDF

Tuesday, July 15, 2008

போஸ்டர்கள்

பெண் குழந்தைகளுக்கென பிங்க் வண்ணத்தையும் ஆண் குழந்தைகளுக்கென நீல வண்ணத்தையும் இந்த சமுதாயம் குறித்துவைத்திருப்பது பரிமளா சொல்லித்தான் தெரியும். நல்ல வேளை ஷான் பிறந்தபோது Babiesrus-யிலிருந்து அவனுக்கு பரிசாக பிங்க் கலரிலிருந்த அந்த கிப்ட் செட்டை வாங்கிச் செல்லவில்லை. சிரியாய் சிரித்திருப்பார்கள். மோச உலகில் என்னவெல்லாம் தெரிந்திருக்கவேண்டியிருக்கிறது.

ஷானின் குட்டி அக்கா மென்காவின் அறை பிங்க் வண்ண வால்பேப்பர்களாலும், வண்ணத்துப் பூச்சிகளும் மலர்களும் நிறைந்த போஸ்டர்களாலும் நிரம்பியிருந்தது. ஆங்காங்கே அறையில் பார்பி பொம்மைகளும் கரடி பொம்மைகளும். ஒரு மேக் அப் மேஜையும் உண்டு. இப்போது புதிதாய் வந்திருக்கும் பொடியன் ஷானின் அறையும் போஸ்டர்களால் நிறைந்திருக்கிறது. ஆனால் பேஸ்பால், புட்பால், ஹாக்கி, யாங்கீஸ், மெட்ஸ், ரெட்சாக்ஸ் என நிறைந்திருக்கிறது. என்ன சொல்ல வருகின்றார்கள்?

நான் ஒரு டெக்கி.என் கியூபிலும் போஸ்டர்கள் ஒட்டிவைத்திருக்கிறேன். இதோ சில உதாரணங்கள்.

History of Programming languages Poster
Domain name system Poster
Windows Server 2008 Feature Components Poster
Tamilnadu Map
Anatomy of a Linux system Poster
Web Trend Map Poster
SQL2005 System Views Poster
Computer Languages Chart
Windows Server 2008 Active Directory Components Poster
dot NET35 Namespaces Poster
Linux Kernel Map
Web Services Standards Poster
Adobe Flex Posters
Country Chart
ccTLD_Country codes of the world
Perl6 Periodic Table of Operators
Http headers status Poster

இந்த வகையான பெரிய போஸ்டர்களை நீங்கள் எந்த பிரிண்டர் வைத்திருந்தாலும் எளிதாக அச்சு செய்யலாம். அதற்காக கீழ்கண்ட தீர்வுகள் உங்களுக்கு உதவும். இவை எந்த மாபெரும் போஸ்டரையும் பல A4 அளவு தாள்களாக அச்சுசெய்து தரும்.

இணையேற்றம் செய்து அச்சு செய்ய உதவும் தளங்கள்.
http://homokaasu.org/rasterbator
http://www.blockposters.com/default.aspx

பெரிய போஸ்டர்களை அச்சு செய்ய உதவும் மென்பொருள்.
http://posterazor.sourceforge.net

சில பிரிண்டர்கள் poster printing அல்லது tiled printing வசதி கொண்டிருக்கும். நன்கு உற்று பார்க்கவேண்டுமாக்கும். கூகிளின் Picasa-விலும் Make a Poster வசதியிருக்கின்றது. அதுவும் இதுமாதிரி பெரிய போஸ்டர்களை அழகாய் துண்டு துண்டாக்கி தரும்.

இப்படி பல வகையான போஸ்டர்கள் இங்கு இருக்கின்றன.
ஆனாலும் சிறுவயதில் சலூன்களில் பார்த்த அந்த வகையான போஸ்டர்கள் தான் மறக்க முடியாதவை.

வி.இ.லெனின் மார்க்சியத்தின் வரலாற்று வளர்ச்சியின் சில சிறப்பியல்புகள் இங்கே தமிழில் சிறு மென் புத்தகமாக. V.I.Lenin On some peculiarities of the historical development of Marxism Marxia Varalaaru history in Tamil pdf ebook Download. Right click and Save.Download


Email PostDownload this post as PDF

Monday, July 14, 2008

அளவுகள் சித்திரமாக

1969-ல் நீல் ஆம்ஸ்ட்ராங் நிலவில் இறங்க எவ்வளவு கணிணித் திறன்கள் தேவைப்பட்டதோ அவ்வளவு கணிணி திறன்கள் நம் வீட்டுக் கணிணிகளுக்கும் போன இரண்டாயிரமாம் ஆண்டிலேயே வந்துவிட்டது. இன்றைக்கு அதை விட பலமடங்கு கணிணித்திறன்கள் கொண்ட கணிணிகள் நம் வீடுகள் தோறும் இருந்தும் எத்தனை சாதனைகள் நிகழ்ந்துள்ளன. சமீபத்தில் இங்கு ஒரு அமெரிக்கரோடு பேசிக் கொண்டிருந்தேன். சும்மானாச்சும் உங்கள் பொழுதுபோக்கு என்னவென வினவினேன். வீட்டில் ஒரு சிறு ஆய்வகமே வைத்திருப்பதாகவும் என்னென்னமோ ரிசர்ச்சுகள் மேற்கொண்டுவருவதாகவும் கூறினார்.எட்டு மணிநேர அலுவலக வேலைக்கும் அப்பால் வீட்டில் ஆய்வறை அமைத்து பல நூல்களையும் ஆய்வுசெய்து என்னவாவது புதிதாய் கண்டுபிடித்து மனித சமுதாயத்துக்கு நல்லது செய்யவேண்டும் என்ற அவரது ஆர்வம் எனக்கு வியப்பை தந்தது.மேற்கத்திய கலாச்சாரமென என்னவெல்லாமோ இறக்குமதி செய்கின்றோம் இந்த மாதிரி ஒரு சில நல்ல விஷயங்களையும் இறக்குமதி செய்குதல் நல்லது. நமக்கு சீரியல்களை பார்க்கவே சமயம் போதமாட்டேன்கிறது. ஆனாலும் சின்ன சின்ன மாறுதல்கள் நம்மூரிலும் நடந்து கொண்டுதான் இருக்கின்றன. சமீபத்தில் நண்பர் ஒருவரிடம் பேசிக்கொண்டிருந்தேன். மூன்று கணிணிகள் நெட்வொர்க் அமைத்து, வயர்லெஸ் ரவுட்டர், NAS , விர்சுவர் செர்வர்கள் சகிதம் ஒரு குட்டி கணிணி லேப்பே தன் வீட்டில் வைத்திருப்பதாகவும் தன் வீட்டு பொடிசுகளும் இந்த விஷயங்களில் அத்துபடி எனவும் கூறினார். மகிழ்ச்சியாக இருந்தது.

250GB ஹார்ட் டிரைவ் உள்ள மடிக்கணிணி வாங்கும் போது ஆகா இந்த ஸ்பேஸ் எனக்கு ஜென்மத்துக்கும் காணும் என்றான் கோபால். நேற்றைக்கு "Out of space" செய்தி வந்தது.என்னடா இதோட ரோதனையா போச்சுவென என்னிடம் கொண்டு வந்தான். அதில் தமிழ் சினிமா 75 வருட ஸ்பெஷல் போல் ஆடியோ வீடியோவென திருவிளையாடல் முதல் தசவதாரம் வரை இருந்தது. எதையும் அழிக்கவும் அவனுக்கு மனசு இல்லை. windirstat-டின் நினைவு வந்தது. இந்த மென்பொருளை நிறுவி மெலிதாக நோட்டமிட்டேன். எந்த எந்த ஃபோல்டர்கள் மெகா சைசு போல்டர்கள் அதில் எந்த எந்த கோப்புகள் மெகா சைசு கோப்புகள் என அழகாக அது படம் போட்டு காண்பித்தது. சீக்கிரமே அநேக தேவையற்ற மிகப்பெரிய கோப்புகளை, ஃபோல்டர்களை எளிதாய் கண்டுபிடித்தோம். அழித்துவிட்டோம். அரைமணிநேரத்தில் 10GB வரைக்கும் மீட்டெடுத்தோம். நீங்களும் பயன்படுத்த இது ஒரு நல்ல இலவச மென்பொருள்.எங்கோவோ எப்போதோ அவசரமாய் காப்பி செய்து வைத்து பின் மறந்து போன மெகாசைஸ் போல்டர்கள் மற்றும் கோப்புகளை எளிதாய் இது படம் போட்டு காட்டும்.

உங்கள் ஹார்ட் டிரைவ் பயன்பாட்டை கண்காணிக்க இது நெஜமாலுமே ஒரு நல்ல மென்பொருள் தான்.

http://windirstat.info

இந்துமகேஷின் "மேனியைக்கொல்வாய்" குறுநாவல் இங்கே தமிழில் சிறு மென் புத்தகமாக. InthuMahesh Meniyai Kolvaai short novel in Tamil pdf ebook Download. Right click and Save.Download


Email PostDownload this post as PDF

Sunday, July 13, 2008

ரோபோ ராஜ்ஜியம்

ஒரு நாயைக் கண்டாலோ அல்லது ஒரு மொடாக்குடியனைக் கண்டாலோ நமக்கு நம்மையறியாமலே ஒரு பயம் வரும். ஏனென்றால் அவை இரண்டுக்குமே நல்லவன் யார் என்றும் கெட்டவன் யாரென்றும் தெரியாது. குலைத்துக்கொண்டே இருக்கும். எப்போது அவை என்னச் செய்யும் என்று நமக்குத் தெரியாது.அந்த வரிசையில் இப்போது நாம் ரோபோட்டையும் சேர்த்துக் கொள்ள வேண்டி இருக்கிறது. ரோபோ அது ஒரு இயந்திரம் அதற்கு நாம் ஏன் பயப்படவேண்டும்?

சோம்பல் மனிதர்கள் ரோபோக்களை அசம்பிள் செய்ய மாய்ச்சல் பட்டு அவ்வேலையை ரோபோக்களிடமே கொடுக்க அவ்ரோபோக்களோ தங்களை தாங்களே உருவாக்கி பூமியை நிரப்பி பின் மனிதனை பின்னங்கால் தட்டத் துரத்துகின்றது. இப்படி ஒரு கெட்டக் கனவு அநேகருக்கு.

ஒருவேளை அப்படி அவ்ளோ பெரிய ரோபோக்கள் உருவாகி நம்மை துரத்தாவிட்டாலும் பொட்டு பொடிசாய் நானோசில்லுப்பூச்சிகள் பல தோன்றி, நம் கட்டுக்கே அடங்காமல், வெறும் சூரிய ஆற்றலை மட்டும் உள்வாங்கிக்கொண்டு கரப்பான்பூச்சிகள் போல இண்டுஇடுக்கெங்கும் சுத்திக்கொண்டிருக்க வாய்ப்புகள் அதிகம் இருக்கின்றனவாம். சாதா சிலிக்கான் சிப்புகள் தானே அவை. எளிதாய் உருவாகிவிடும். டியூப் லைட்டின் பக்கத்தில் ஒரு பல்லி உட்கார்ந்து கொண்டு என்னையே பார்த்துக் கொண்டிருக்கிறது. அது உண்மையிலேயே பல்லியா அல்லது யாரோ ரிமோட்டாய் ஏவி விட்ட ரோபோ கம் கேமராவா யானறியேன்.கிச்சன் போகும் போது கூட அது என் கூடவே வருகின்றது.

இப்போது அதுவும் போதாதுவென டீம் ஸ்பிரிட்டையும் ரோபோக்களுக்கு கற்றுக் கொடுக்கின்றார்கள். அவை ஒன்றுக்கொன்று அழகாய் பந்தை கடத்திக் கொண்டு போய் குழுவாய் கால்பந்தாடுகின்றன. பட்டாளம் கூட நெருங்கப் பயப்படும் தீவிரவாத புள்ளிகளையும் நெருங்க துப்பாக்கியேந்திய ரோபோக்கள் குழுவாய் இயக்கப்படுகின்றன. அவைகள் இணைந்து ஒன்றாய் அப்புள்ளியை சுற்றி வளைக்குமாம். அதுவே கொஞ்சம் வித்தியாசமாய் எதிர் வினையாகிப்போய் வீட்டிலுள்ள ரோபோ சாதனங்களெல்லாம் ஒன்றாய் சேர்ந்து எரிச்சலூட்டும் எஜமானனையே அடிக்க வந்தால்..

அவ்வளவுதூரம் ஏன் போகின்றோம். பளாரென நம் கன்னத்தில் ஒரு அறைவிட்டுக் கொண்டு ஸாரி சார் அது ஒரு சாப்ட்வேர் bug-குனு சொல்லி அதுவால் நம்மை சமாளிக்க முடியும். நாம் அதை திருப்பி அடித்தால் அதற்கென்ன வலிக்கவாபோகின்றது.

இரமணிச்சந்திரன் கிழக்கு வெளுத்ததம்மா தமிழ் நாவல் இங்கே மென் புத்தக வடிவில். Ramani Chandran Kilakku Veluthathamaa novel in Tamil pdf ebook Download. Right click and Save.Download


Email PostDownload this post as PDF

Thursday, July 10, 2008

தந்தைக் காற்றும் உதவி

இரு வருடங்களுக்கு முன்பு ஒரு நாள். காலையில் எழுந்த கோபாலின் அப்பாவுக்கு தொண்டைக்கு சரியில்லாமல் இருந்திருக்கிறது. அவரால் ஒழுங்காக பேச இயலவில்லை. முந்தின நாள் நடைபெற்ற ஒரு திருமண வைபவத்தில் ஐஸ்கிரீம் சாப்பிட்டதால் ஒருவேளை தொண்டையில் சளி கட்டியிருக்கலாம்.எதற்கும் டாக்டரிடம் காண்பிக்கலாமென காலையிலேயே அவரை மருத்துவமனை கொண்டு சென்றிருக்கிறார்கள். மருத்துவமனையில் சேர்க்கப்பட்ட அவர் நாள்முழுவதும் அங்கே தான் இருந்திருக்கிறார். இரவு 10.30 மணிவாக்கில் செய்தி வந்திருக்கிறது அவர் மாரடைப்பார் காலமானார் என்று. அப்புறமாகத்தான் கோபாலுக்கு பல விஷயங்கள் தெரியவந்தன. அதாவது முந்தின நாள் இரவே அவருக்கு முதல் சுற்று மாரடைப்பு வந்திருக்க வேண்டுமென்றும் அவருக்கு சர்க்கரை வியாதி இருந்ததால் அவருக்கு அந்த மார்புவலி தெரியாமல் போனதென்றும் அடுத்த நாள் ஏற்பட்ட தொண்டை கட்டு அந்த மாரடைப்பின் அறிகுறியாகவே இருந்ததுவென்றும் உஷாராய் இல்லாத அந்த மருத்துவக் குழுவால் அதை ஒழுங்காக கணிக்க முடியாதிருந்ததால் அடுத்த நாள் ஏற்பட்ட இரண்டாம் சுற்று மாரடைப்பு அவரை கொண்டு சென்று விட்டது எனவும் அடிக்கடி சோகமாகக் கூறி என்னிடம் வருத்தப்படுவான்."இதை உன் நண்பர்களுக்கும் சொல்.யாருக்கும் இப்படி நடந்துவிடக்கூடாது. எவருக்கு இதுமாதிரியான செய்திகள் எப்போது உதவியாய் இருக்குமென தெரியாது" என்பான்.

அமெரிக்க மருத்துவமனைகளில் ER (Emergecy room) என்றொண்டு.ஆத்திர அவசரமாய் போனாலும் ரத்தம் சொட்டச் சொட்ட போனாலும் அத்தனை எளிதாய் டாக்டரை பார்க்க முடியாது. உடனடி சிகிட்சையின்றி ER-யிலேயே துடி துடித்துச் செத்துப் போனவர்கள் பற்றியும் செய்திகள் கேள்விபட்டிருக்கிறேன். உண்மையிலேயே ஏதாவது அவசரமெனில் 911 கூப்பிட்டு ஆம்புலன்சில் போனால் தான் உடனடி சிகிட்சை கிடைக்கும் போலும். ஆனால் ஒரு முறை உள்ளே போய்விட்டால் அத்தனை டெஸ்ட்களையும் செய்யச் சொல்லி ஆளை புரட்டி எடுத்து விடுகின்றார்கள்.எல்லா செலவையும் இங்கே மெடிக்கல் இன்சூரன்ஸ் பார்த்துக்குதே. ஆக மேல் நான் சொன்ன கோபாலின் அப்பா நிகழ்வு அமெரிக்காவில் நடந்திருந்தால் எதாவது ஒரு மருத்துவ டெஸ்ட் அதை காண்பித்துக்கொடுத்திருக்கும். அவரும் பிழைத்திருப்பார்.

"ஏப்ரல் மாதத்தில்" கதையில் தோன்றும் ஸ்ரீகாந்துக்குக்கு ஒரு ஆசையிருக்கும் அவர் அம்மாவை எப்படியாவது ஒரு நாள் விமானம் ஏற்றி காண்பிக்க வேண்டுமென்று. அது போலவே கோபாலுக்கும் ஒரு ஆசையிருந்திருக்கிறது. அப்படியே கருகிப்போனது. அதுதான் வேதனையின் உச்சக் கட்டம்.

நம் வலைப்பதிவுக்கு அவ்வப்போது வருகை தரும் Dr.K ஒருமுறை இப்படியாக எழுதியிருந்தார்."ஹலோ பிகேபி சார், சப்ஜெக்ட் கொஞ்சம் ஹெவி. என் தந்தை வானுலகம் ஏகி 4 வருடங்கள் ஆகிவிட்டன. அவரை நினைக்காத நாளே இல்லை. தந்தையை விட தோழர் என்றே சொல்லலாம்.அப்படி ஒரு ஜென்டில்மேன்.சிறு வயதில், ரத்தம் சூடான சமயத்தில் பல தடவை அவரிடம் சண்டை போடுவேன். நானும் அவர் மீது பாசமாய்தான் இருப்பேன். அவர் மிலிட்டரி ரிட்டையர்டு, நான் மெடிக்கல் காலேஜ் படிக்கும் போது ரெண்டு பேரும் ஒன்றாய் சரக்கு சாப்பிடுவோம். சிறு வயதிலேயே சோமபானத்தை ஒழுங்காக கையாண்டதால், அதை பெரிய தவறு என்று சொல்ல மாட்டேன்.

இப்போதெல்லாம் அவரை பற்றி நினைக்கும் போது இன்னும் நன்றாக அவரை பார்த்துக் கொண்டிருக்கலாம் என்று நினைக்கிறேன்.என்ன செய்வது காலம் கடந்த ஞானம்.இதைப் படிக்கும் அன்பர்களுக்கு நான் சொல்வது "வாழும் காலம் குறைவு ஆகையால் தாய் தந்தையரை பேணி பாதுகாருங்கள்" As some englishman used to say "The day you start realising what your father said was right, you already have a son who says you are wrong "

என் அப்பாவின் இன்னொரு சொல்வடை "தெரிஞ்ச தொழிலை தொடாதவனும் கெட்டான், தெரியாத தொழிலை தொட்டவனும் கெட்டான்" இது எப்படி இருக்கு" என்று எழுதியிருந்தார்.

மேல் சொன்ன இரண்டு சம்பவங்களும் அடிக்கடி ஏனோ என் நெஞ்சில் வந்து போய்க் கொண்டிருந்தன. அதனால் இன்று இதை எழுதத் துணிந்தேன்.

இப்படி ஒரு வாக்குமூலத்தை தன் மகன் வாயாலே சொல்லவைக்குமளவுக்கு வாழ்ந்த தந்தைகள் எல்லாருக்கும் கொடுத்து வைக்காது தான். அதுவும் ஒரு வித அதிஷ்டமே. ஆனால் எல்லோரும் அது போன்ற ஒரு தந்தையராய் வாழ முயலலாம். நம் குழந்தைகளுக்காவது அவ்வதிஷ்டம் கிடைக்குமே.

வேதாகமமும் நிகழ்வுகளும் ஒரு கிறிஸ்தவ மென்புத்தகம் இங்கே தமிழில். Bible and Incidents Christian Tamil pdf ebook Download. Right click and Save.Download


Email PostDownload this post as PDF

Wednesday, July 09, 2008

இன்னொரு காற்று

கல்லில் பொறிக்கப்பட்ட எழுத்துக்கள் போல ஒரு அசைவேயின்றி மரத்துப்போய் இருந்தன அந்தகாலத்திய இணையப்பக்கங்கள். அப்புறமாய் html-ன் Marquee tag-ஐ வைத்து எழுத்துக்களை கொஞ்சம் ஓட விட்டனர். பின் animated gif-ஐ கண்டுபிடித்து படங்களுக்கு சிறிது உயிர் கொடுத்தனர். கடைசியாய் அடோபியின் flash வந்தாலும் வந்தது எல்லா இணைய பக்கங்களும் புத்துயிர் பெற்றன-பளாபளாவாயின-ஒவ்வொரு சட்டங்களும் உயிர்கொண்டோடின. இன்றைக்கும் யூடியூப் முதலான வெற்றிகரமான தளங்கள் உருவாக அது காரணமாயிற்று.

Pdf,Flash போன்ற அருமைகளை நமக்களித்த அதே அடோபி நிறுவனம் (adobe) இப்போது புதுசாக AIR என்று புதிய நுட்பத்தை அறிமுகப்படுத்தியிருக்கின்றார்கள்.Adobe Integrated Runtime என்பதுதின் சுருக்கம் தான் AIR.

இன்றைய இணையத்தை உங்கள் கணிணியின் விண்டோஸ் டெஸ்க்டாப்போடு அல்லது லினக்ஸ் டெஸ்க்டாப்போடு நெருக்கமுற இணைப்பது தான் இந்நுட்பம். உதாரணத்துக்கு கிரிக்கெட் ஸ்கோர் இணையத்தில் பார்த்துக்கொண்டே இருக்கின்றீர்கள் என வைத்துக் கொள்வோம். இனி அப்பப்போ அப்டேட்டட் ஸ்கோரை பார்க்க பிரவுசரை refresh செய்யவேண்டாம். உங்கள் கணிணியில் நிறுவப்பட்டுள்ள அந்த சிறு பளாபளா AIR சார் மென்பொருள் நீரோட்டம் போல ஸ்கோரை லைவாக உங்களுக்கு காட்டிக் கொண்டே இருக்கும். அதுபோல ஈபேயில் ஏலமெடுக்கும் போதும் உங்களின் தற்போதைய நிலை லைவாக உங்களுக்கு தெரிந்துகொண்டே இருக்கும்.ஒவ்வொரு முறையும் refresh செய்யவேண்டிய தேவைப்படாது.

இந்த AIR சார் மென்பொருள்கள் உங்கள் கணிணியில் நிறுவப்படும் Adobe Integrated Runtime எனும் மென்படலத்தின் மேல் ஓடுவதால் இந்த பயன்பாடுகளை நீங்கள் எல்லா OS-யிலும் பயன்படுத்தலாம்.

இந்த Runtime-ஐ நீங்கள் கீழ்கண்ட சுட்டியிலிருந்து இறக்கம் செய்துகொள்ளலாம்.
http://get.adobe.com/air/ அல்லது
http://airdownload.adobe.com/air/win/download/1.0/AdobeAIRInstaller.exe

புதுசு புதுசாக பல AIR சார் மென்பொருள்கள் வெளிவந்தவாறு உள்ளன. உங்களுக்கு HTML, CSS மற்றும் Javascript தெரிந்திருந்தால் அல்லது AJAX, Flash, Flex மற்றும் ActionScript தெரிந்திருந்தால் இது மாதிரியான Adobe’s AIR சார் பயன்பாடுகளை எளிதாய் படைக்கலாம். இப்போதைக்கு நல்ல கிராக்கியாம். சூப்பராய் ஒரு பயன்பாட்டை உருவாக்குங்கள். சீக்கிரமாய் உலக அளவில் பிரபலமாயிடுவீர்கள்.
இதற்கான SDK இங்கே கிடைக்கின்றது.http://www.adobe.com/products/air/tools/sdk/
சில புத்தகங்கள் இங்கே கிடைக்கின்றன.http://www.adobe.com/support/documentation/en/air/

உதாரணத்திற்கு AIR-ல் உருவான கூகிள் ரீடர் ReadAir-ஐ முயன்றுபாருங்கள்.
http://code.google.com/p/readair/

லைட்வெயிட்டாய் கண்ணாடிப் பட்டுப் போல் பளபளாவென உங்கள் டெஸ்க்டாப் வரும் இந்த AIR இனி என்னென்ன மாயங்கள் செய்யப்போகின்றதோ?

ஹஜ் உம்ரா வழிக்காட்டி இங்கே தமிழில் சிறு மென் புத்தகமாக. Haj Umra Guide in Tamil pdf ebook Download. Right click and Save.Download


Email PostDownload this post as PDF

Monday, July 07, 2008

கடலடியில் சந்தித்தோம்

நாடுகளிடையேயான இணைய பரிமாற்றங்களில் 90 சதவீதம் பைபர் ஆப்டிக் கேபிள்கள் வழியும் 10 சதவீதம் செயற்கைகோள்கள் வழியும் நடக்கின்றன. இந்த பைபர் ஆப்டிக் கேபிள்கள் கடல்வழியாய் பூமியின் அனைத்து கண்டங்களையும் இணைக்கின்றன. அண்டார்டிக்காவைத் தவிர. (சில கடலடி கேபிள் படங்கள் கீழே)

கடல் வழி கேபிள்கள் போடுவது ஒன்றும் புதிய யுக்தி அல்ல. 1850-களிலேயே இதுமாதிரி கடலடிகேபிள்களை இங்கிலாந்தில் போட்டிருக்கின்றார்கள் .1870-ல் மும்பையும் லண்டனும் இப்படி கடலடி கேபிள்களால் இணைக்கப்பட்டிருந்தன.

இன்றைக்கு துபாயின் E-marine, சிங்கப்பூரின் Asean Cableship போன்ற நிறுவனங்கள் கப்பல்கொண்டு இந்தமாதிரி கடலடி கேபிள்களை நிறுவுகின்றன. சும்மா இல்லை, ஒரு மீட்டர் பைபர் ஆப்டிக் கேபிளின் எடை 10 கிலோ இருக்குமாம்.

இந்தியாவை உலகெங்கும் இணைக்க கீழ்கண்ட நம் நகரங்களிலிருந்து கடலடி நீர்மூழ்கி கண்ணாடி இழை கேபிள்கள் பல நாட்டு நகரங்களுக்கும் செல்கின்றன. அவை மும்பை, பூனா, சென்னை மற்றும் கொச்சின்.

நமது சென்னையிலிருந்து கீழ்கண்ட கடலடி கேபிள்கள் அக்கரைசீமைக்கு செல்கின்றது.

TIC (Tata Indicom Cable)- இந்த fiber-optic கேபிள் சிங்கப்பூருக்கு செல்கின்றது. இது முழுக்க முழுக்க Tata Communications (முன்னாள் VSNL)-க்கு சொந்தமானது. இதன் நீளம் 3175 கிமீ. இதன் வேகம் 5.12 Tbps.

SEA-ME-WE 4 (South East Asia–Middle East–Western Europe 4)- இந்த கடலடி கேபிளின் ஒரு கிளை சிங்கப்பூருக்கும் மற்றொரு கிளை கொழும்பு போய் பின் மும்பை போய் அப்படியே மேற்கத்திய நாடுகளுக்கும் செல்கின்றது.

i2i CN - இந்த கடலடி கேபிள் சென்னையிலிருந்து சிங்கப்பூருக்கு செல்கின்றது.இது Bharti Airtel -க்கு சொந்தமானது.

FALCON - இந்த கடலடி கேபிள் சென்னையிலிருந்து ஹாங்காங்குக்கு செல்கின்றது.இது Reliance Communications -க்கு சொந்தமானது.

இப்படி எனக்கு தெரிந்து நான்கு கடலடி கேபிள்கள் சென்னையை உலகோடு இணைக்கின்றது.

இன்னொரு LOCOM எனும் கடலடி கேபிளும் நமது சென்னையை மலேசியாவோடு இணைக்கின்றது என்கின்றார்கள். உறுதியாய் தெரியவில்லை.

Reliance Communications-ன் Reliance FLAG - தான் உலகின் மிக நீளமான தனியார் கடலடி கேபிள் ஆகும். இது 65,000 கிமீ நீளமானது.

அடுத்ததொரு யுத்தம் வந்தால் Star war என்று சொல்லிக்கொண்டு தகவல் தொடர்பு செயற்கை கோள்களை தகர்ப்பது போல Fiber war என்று சொல்லிக்கொண்டு தகவல் தொடர்புக்கு உதவும் இந்த கடலடி கேபிள்களையும் சில முட்டாள் மனிதர்கள் தகர்ப்பார்கள். அதுவரைக்கும் உலகம் இப்படிச் சுருங்கிக்கொண்டே தான் இருக்கும்.

இதோ நான் எங்கோ இருந்து எழுதியிருக்க நீங்கள் எங்கோ இருந்து படித்துக் கொண்டிருக்கிறீர்களே. எந்த கடலடி கேபிள் வழி சந்தித்தோமோ?





உலக கடலடி கேபிள்கள் மேப் pdf வடிவில்
http://www1.alcatel-lucent.com/submarine/refs/World_Map_LR.pdf

உலக கடலடி கேபிள்கள் மேப் flash வடிவில்
http://www.tatacommunications.com

மு.பெ.சத்தியவேல் முருகனார் திருமந்திரச் சிந்தனைகள் இங்கே தமிழில் சிறு மென் புத்தகமாக. M.P.Sathyavel Muruganaar Thirumanthira Sinthanaigal in Tamil pdf ebook Download. Right click and Save.Download


Email PostDownload this post as PDF

Sunday, July 06, 2008

ரேப்பிட் வைரஸ்கள்

விண்டோஸ் எக்ஸ்பியில் அடிப்படையிலேயே பயர்வால் ஒன்று ஓடிக்கொண்டே உள்ளதால் இப்போதெல்லாம் வைரஸ்கள் தானாக வந்து உங்கள் கணிணியை தாக்குவது அபூர்வமே.மாறாக நாமாகப் போய் வலிய வம்பை விலைக்கு வாங்கிக் கொண்டால் தான் உண்டு.ஏடாகூடாமான தளம் எதற்காவது போய் அங்கு தோன்றும் ஒரு பாப் அப் விண்டோவில் "Yes" சொல்லி வைரஸை விலைக்கு வாங்கும் ரகம் பாமர கணிணி பயனர்கள் ரகம் எனில் தேடிப்போய் ஒரு குறிப்பிட்ட ".exe" கோப்பை ரேப்பிட்ஷேரிலிருந்தோ அல்லது இது போன்ற இன்ன பிற கோப்புகிடங்குகளிலிருந்தோ இறக்கம் செய்து அது வழி வைரசை தங்கள் கணிணிக்கு இறக்குமதி செய்யும் ரகம் கீக் (Geek) கணிணி பயனர்கள் ரகம்.

எதாவது ஒரு பயன்பாடு வேண்டுமெனில் உடனே அதற்காக பட்டென ஏதாவது ஒரு ரேப்பிட்சேர் சுட்டியிலிருந்து அதை இறக்கம் செய்வது அத்தனை பாதுகாப்பானதல்ல. முடிந்த வரைக்கும் நம்பகமான தளத்திலிருந்து மட்டுமே "எக்சிகியூட்டபிள்"-களை இறக்கம் செய்வது நல்லது. அல்லது இறக்கம் செய்ததும் நன்றாக ஸ்கேன் செய்ய ஒரு நல்ல வைரஸ் ஸ்கேனராவது உருப்படியாய் வைத்திருத்தல் வேண்டும்.

MP3 கோப்புகள், வீடியோ கோப்புகள், PDF கோப்புகள் ,சில சமயம் CBTகள் இது தவிர பிற வகை கோப்புகளை முக்கியமாய் exe கோப்புகளை இறக்கம் செய்து உங்கள் கணிணியில் ஓட விடுதல் அத்தனை பாதுகாப்பான பழக்கம் அல்லவே. எவர் என்ன நோக்கில் அந்த மென்பொருளை அங்கு சேமித்து வைத்துள்ளாரோ? அதனுள் ஏதாவது வைரசோ அல்லது பிற மர்ம ட்ரோஜன்களோ ஒளிந்திருந்தால் அது நமக்கு சுத்தமாய் தெரிவதில்லை. நம்மில் பலரும் வைரசில் மாட்டிவிடல் இப்படித் தான்.

அது இப்படி இருக்க, இங்கே ஒரு டிப்.

ரேப்பிட்சேரில் 100MB-க்கும் பெரிதான கோப்புகளை சேமிக்க முடியாததாகையால் டிவிடிக்களை நூறு நூறு Meg-காக பல .rar துண்டுகளாக்கி ஒரு குழுவாக இணைஏற்றம் செய்து வைத்திருப்பார்கள். பத்து .rar கோப்புகளில் ஒன்பதை பல மணிநேரமாய் இறக்கம் செய்த பின் 10வது இறக்கமாக மறுக்கும். அனைத்தையும் இறக்கம் செய்யாமல் Winrar-ம் அவ்வீடியோவை Extract செய்யவிடாது. ஒரே டென்சனாகிப் போகும். குறைந்தது இறக்கம் செய்துள்ள அந்த ஒன்பது .rar கோப்புகளில் உள்ள வீடியோவையாவது பார்க்க வழியுள்ளதா?
ஆம் உள்ளது.

அந்த .rar கோப்புக் குழுவை விரிவாக்கம் செய்யும் முன் மறக்காமல் "Keep broken files" -ஐ Winrar-ல் டிக் செய்துகொள்ளுங்கள்.(படம்)

பத்தாவதை பார்க்க இயலாவிட்டாலும் மற்ற ஒன்பதையாவது பார்க்கலாம்.

பாமாவின் கருக்கு மற்றும் சங்கதி ஆகிய இரு நூல்களின் தொகுப்பு "தழும்புகள் காயங்களாகி" நூல் இங்கே தமிழில் சிறு மென் புத்தகமாக. Baama Karukku Sangathi Books as Thalumbugal Kayangalaagi in Tamil pdf ebook Download. Right click and Save.Download


Email PostDownload this post as PDF

Thursday, July 03, 2008

ஆயிரத்தோராவது பிரச்சனை

பிரபலங்களுக்குள்ள ஆயிரம் பிரச்சனைகளில் இது ஆயிரத்தோராவது பிரச்சனை. நிம்மதியாக எங்கும் போக முடிவதில்லை. எப்போதும் யாரோ தன்னை கேமராவில் கண்காணித்துக் கொண்டிருப்பது போன்றே தோன்றும் துபாய் போனால் ஒழுங்காக தூங்க முடிவதில்லை, தென் ஆப்ரிக்கா போனால் கூட அட சுதந்திரமாக அங்கு குளிக்க முடிவதில்லை, மும்பை போய் ஒரு துணிமணி எடுக்கலாமெனில் ஷாப்பிங் மால்களின் டிரஸ்ஸிங் ரூம்களுக்குள் போகவே பயமாயிருக்கிறது.Pinhole அதாவது குண்டூசி அளவேயான மறைந்திருக்கும் கேமராக்கள் உங்களை படம்பிடித்துக் கொண்டிருக்கலாம்.படுக்கை அறையில் சாதாரண கடிகாரம் தானே இருக்கின்றது என அந்த பிரபலம் நினைக்க ஆனால் அதற்குள் தான் அந்த மர்ம காமரா ஒளிந்திருக்கும்.மேஜையில் புசு புசுவென இருக்கும் டெட்டிபியர் கரடி பொம்மையை எடுத்து கொஞ்சலாம் போல் தோன்றும் ஆனால் அதற்குள்ளே தானே அவருக்கு ஒளிந்திருக்கு ஆப்பு (காமெரா).ஏன் ஜேம்ஸ்பாண்ட் கணக்காலும் சாதாரண சட்டைபொத்தான் வடிவில் கூட ஹிடன் கேமராக்கள் இப்போது வந்துள்ளன.

இவற்றிலிருந்து தப்ப வழி இருக்கின்றதா?
அந்த காலத்தில் இராணுவ அல்லது அரசின் பிரத்தியேக உபயோகத்துக்கென இருந்த பல ரகசிய தொழில் நுட்பங்கள் இன்று சாதாரண குடிமகன்கள் கைக்கு எட்டும் அளவுக்கு வந்துவிட்டன. உதாரணமாய் GPS-ஐ சொல்லலாம்.சில வருடங்களுக்கு முன்பு வரை மிலிட்டரி பயன்பாடுகளுக்கு மட்டுமே அது பயன்படுத்தப்பட்டு வந்தது. இப்போது கோபால் கூட ஒன்றுக்கு இரண்டு வைத்திருக்கின்றான்.இன்றைய அளவில் இராணுவ அல்லது அரசின் பிரத்தியேக உபயோகத்துக்கென இருக்கும் ரகசிய தொழில் நுட்பங்கள் என்னென்னவோ யாருக்குத் தெரியும். தெரிய வந்தால் நமக்கு அநாவசியமாய் திகில் தான் பிடிக்கும்.
பெரும்பாலும் 2020-யில் அது வெளி உபயோகத்துக்கு வந்து நான், ஒரு ரேடியோ பெட்டியூண்டு அளவிலுள்ள தானியங்கி மினி நானோ-ஹெலிக்காப்டரில் வைத்து நியூயார்க்கிலிருந்து சென்னையிலிருக்கும் என் ஆசானுக்கு பரிசுபொருள் ஒன்றை கூரியர் போல அனுப்புவேன். அந்த கால தூதுபோன புறாபோல சென்னைபோய் திரும்ப என்னிடம் வரும்.கொஞ்சம் ஓவர் கற்பனையோ?

அதுவரை நியூயார்க் தாக்குபிடிக்கவேண்டும்.அணுஆயுத போர் வந்தால் அது தான் முதல் டார்கெட் அப்படி இப்படினு பலரும் பலதாய் பேச அது பற்றி இன்னொரு பதிவில் பார்க்கலாம்.கலிபோர்னியா போகலாமெனில் அங்கு ஒரு மாபெரும் பூமியதிர்ச்சி வர காத்திருக்கின்றதாம்.டிக் டிக்... திக் திக்...

நிற்க

இது போல முன்பு அரசு பயன்பாட்டிலிருந்து இப்போது பொதுவில் வந்துள்ள ஒரு கருவி தான் Spy Finder Hidden Camera Detector/Locator.இது என்னமோ principle of optical augmentation முறைப்படி வேலை செய்கின்றதாம். இந்த கையடக்க கருவி வழி சுற்றும் முற்றும் பார்த்தால் எங்காவது Hidden Camera இருந்தால் அது உடனே உங்களுக்கு காட்டிகொடுத்து விடுமாம்.

கலியுகத்தில் இது ஒரு நல்ல பரிசுபொருளோவென தோன்றுகின்றது. ஏதோ ஒரு இணையபக்கத்தில் அவரை பாவம் அப்பாவி ஏமாந்தவராய் பார்க்கமாட்டோம்.

http://www.brickhousesecurity.com/sf-103.html

லதா "பாம்பு காட்டில் ஒரு தாழை" கவிதைகள் இங்கே தமிழில் சிறு மென் புத்தகமாக.Latha Paambu kaatil oru thaazhai kavithaikal in Tamil pdf ebook Download. Right click and Save.Download


Email PostDownload this post as PDF

Wednesday, July 02, 2008

நின்று கொண்டிருப்பதை விட

நமது பிகேபி விக்கி மன்றம் தொடங்கி இன்றைக்கு சரியாக ஒரு மாதமாகியிருக்கிறது. நான் எதிர்பார்த்ததை விட அங்கு ஏகப்பட்ட சுறுசுறுப்பு.பின்னூட்டம் வழியாகவோ அல்லது மின்னஞ்சல் வழியாகவோ கேள்விகளை கேட்பது நிற்கப்பட்டு இப்போது அங்கு விவாதகளம் சூடாக இயங்கி வருகின்றது.நான் மட்டுமே பதிலளிப்பதில்லை நண்பர்களும் பதிலளிக்கின்றார்கள் என்பது எனக்கு இரட்டிப்பு மகிழ்ச்சி. ஏதோ கேள்வி பதிலென்றில்லாமல் தாங்கள் அறிய வந்த பல நல்ல விஷயங்களையும் நண்பர்கள் அங்கு பகிர்ந்து கொள்கின்றார்கள். ஒருத்தனை மட்டுமே நம்பி இராமல் ஒரு குழுவால் கிடைக்கும் பலம் தானே இன்றைய இணையத்தின் விசேசமே.

சவுதி அரேபியாவிலிருந்து G. ராஜாராமன் அவர்கள் "Splicing எனப்படும் fiber optical cable connecting செய்யும் வேலைக்கு சத்தமில்லாமல் நிறைய வேலை வாய்ப்புகள் உள்ளன. இந்த வேலை வாய்ப்பு Telecomunication, Cell phone towers, மற்றும் அனைத்து தனியார் துறைகளிலும் இப்போது fiber optics use பண்ணுகிறார்கள்" என்று சொல்லி சென்றார்கள்.அப்போது தான் புரிந்தது இதுமாதிரியான அப்பட்டமான அதே வேளை நம் கண்ணுக்கு மறைந்திருக்கும் வேலை வாய்ப்புகள் அதிகம் என்று.

இந்தியாவின் முக்கிய நகரங்களில் நடைபெறும் IT/BPO Walkin களுக்கான வலைத்தளம் http://www.mywalkin.com என அறிமுகப்படுத்திய வேதன் -இவரை எனது வலைப்பதிவில் பார்த்ததில்லை. விக்கி மன்றத்தில் சும்மா விளாசி வருகின்றார். எனக்கு எட்டாத பல விஷயங்களையும் கூட இவர் சொல்வதுண்டு.எனது வலைப்பதிவில் தமிழ் நெஞ்சத்தில் பங்களிப்பு அபாரம் என்றால் விக்கிமன்றத்தில் வேதனின் பங்களிப்பு அபாரம் என்பேன்.நின்று கொண்டிருப்பதை விட சென்று கொண்டிருப்பது மேல் - என்ற கல்யாண்ஜியின் கவிதை வரியை நினைவு கூரும் அவர் தொடர்ந்து இயங்குவது மட்டுமே எப்போதும் முக்கியம் என்கின்றார் சாட்டை அடியாய்.

மேலும் பல தகவல்களை நான் அம்மன்றம் வழி அறியவந்தேன்.ரயில் Online booking ற்கு http://www.irctc.co.in ஐ அல்லது www.erail.in -ஐ அனுகலாமாம்.PNR Status - Other Enquiry ற்கு சிறப்பானது http://www.indianrail.gov.in -ஆம்.

http://icegate.gov.in Indian Customs ன் இணையதளம் இது. ஏற்றுமதி இறக்குமதி (Imports/Exports) செய்பவர்களும் அது சார்ந்த தொழில் தொடங்க விரும்புபவர்களும் தெரிந்து வைத்திருக்க வேண்டிய முக்கிய வலை தளம் இது. Imports-Exports செய்யப்படும் Goods களை Customs language ல் bill என்கிறார்கள். இந்த Bill களை OnLine ல் எப்படி File செய்வது என்பதும், File செய்வதற்கு தேவையான RES (Remote EDI Systems) Package ம், முக்கியமான Documents,Country Code, Scheme Code ம் இங்கே கிடைக்கிறது.மேலும் Customs ற்கும் Importers/Exporters ற்கும் இடைத்தரகர்களாக செயல்படும் Customs House Agents (CHA) ஆக இருப்பவர்களும் அது சார்ந்த தொழில் தொழில் தொடங்க விரும்புபவர்களும், Cargo, Freight, Logistics காரர்களும் தெரிந்து கொள்ள வேண்டிய வலை தளம் இது.(CHA ஆக இருந்தால் செம காசுங்கோ….)

மேலும் Customsன் மாறும் Exchange Rate, Notifications களைத் தெரிந்து கொள்ள http://cbec.gov.in/
மற்றபடி….
http://ices.nic.in/
http://www.chennaicustoms.gov.in/
http://www.mumbaicustoms.gov.in/
http://dgft.delhi.nic.in/
களையும் பார்க்கலாம். இப்படி ஏகப்பட்ட தகவல்கள்(நன்றி வேதன்)

பயர்பாக்சின் கின்னஸ் சாதனை பற்றிய பதிவை நான் எழுதி வைத்திருந்தபோது எனக்கு முந்தி ராம்விபாகர் அவர்கள் அது பற்றிய செய்தியை நமது மன்றத்திலேயே வெளியிட்டு வியப்பூட்டினார்.
அது போலவே வீடுகளில் ஆபாச தளங்களை தடை செய்யும் கடிவாளம் பதிவை நான் எழுதி வைத்திருந்தபோது எனக்கு முந்தி அந்த மதுரைவாலா நண்பர் அது பற்றிய செய்தியை நமது மன்றத்தில் வெளியிட்டு இன்னும் வியப்பூட்டினார்.

வடிவேலன் அவர்கள் "நண்பர்களே மெகாஅப்லோடு, ராபிட்சேர் போன்ற தளத்தலிருந்து டவுன்லோடு பகலில் செய்யவும் ஏன் என்றால் அப்பொழுது அவர்கள் இந்தியாவாக இருந்தால் ஹேப்பி அவர் என்று இலவசமாக உடனே கொடுக்கிறார்கள் இல்லாவிடில் டைம்ஸ்லாட் 1 நிமிடம் பொறுத்திருக்க சொல்கிறார்கள்" என Rapidshare-ன் Happy hour-ஐ அறிமுகம் செய்து வைத்தார்கள்.ஆதாயம்-You don't need to wait for timer and enter captcha in
Happy Hours. ஆனால் அதே டவுன்லோட் லிமிட் இன்னும் இருக்குமாம்.இது ஹேப்பி அவரா என தெரிந்துகொள்ள இந்த மென்பொருளை பயன்படுத்தலாம். (இந்தியாவில் தினமும் காலை 5.30 மணிஅளவில் தொடங்குகிறதாக கேள்வி.)
http://rapidshare.com/files/112883634/RSHappyHourChecker.zip

Happychecker Firefox Addon
https://addons.mozilla.org/en-US/firefox/addon/7353

Tabbed ப்ரொவ்சிங் இப்போது பிரபலம்.எளிதாய் அந்த tab-களிடையே துள்ளிச் செல்ல Ctrl+Tab உபயோகப்படுத்துங்களென சொல்லிச் சென்றார் நண்பர் Kricons.

இப்படி தெரிந்துகொண்ட விஷயங்கள் ஏராளம்.

அந்த சுவிஸ் நண்பரின் சோனி மடிக்கணிணியை சரிசெய்ய இந்த மன்றம் வழி என்னால் உதவ முடிந்தது ஒரு சந்தோசமே.இது போல அநேக சிறு சிறு உதவிகள் பலருக்கும் பலர் மூலமாயும்.

நண்பர் K கேட்டிருந்தார்."குருவி தலையில் பனங்காய்-என் அன்பு பிகேபி சார் சில சமயம் கேள்வி கேட்கும் போது உங்களை நினைத்தால் பாவமாய் இருக்கிறது.புலிவாலை பிடித்து விட்டீர்கள்.ஒவ்வொரு கேள்விக்கும் பதில் எதிர்பார்ப்பார்கள், பதில் தராவிட்டால் மனம் பொக்கென்று போய்விடும்!!எப்படி சம்மாளிக்கிறீர்களோ தெரியவில்லை? இது முழுநேரவேலை ஆகிவிடுமே? எப்படி ஓடப்போகிறதோ காலம்? உங்கள் உற்சாகம் குறையாமல் இருக்க இன்று சாய் ராம் மகாராஜிடம் வேண்டுதல் செய்வேன்"என எழுதியிருந்தார்.

அதற்கு நான் "என்ன எளிதாய் குருவி தலையில் பனங்காய் என்றுவிட்டீர்கள்.உண்மையில் அது பாறாங்கல் என்றிருக்க வேண்டு்மாக்கும். :) எனக்கு தெரிந்ததை நண்பர்கள் கேட்கும் போது எளிதாய் பதில் சொல்லிவிடுகின்றேன். அதில் அவர் பெறும் மகிழ்ச்சியால் எனக்கும் மகிழ்ச்சியே. தெரியாததை கேட்கும் போது தான் வசமாய் மாட்டிவிடுகின்றேன்.நீங்கள் சொன்னமாதிரி அவர்களுக்கும் வருத்தமாகிவிடும்.எனக்கும் வருத்தமாகிவிடும்.
இப்படியே ஓடிக்கொண்டிருந்தாலே போதுமென்றிருக்கின்றேன். சில நண்பர்கள் கூட கேட்கப்படும் கேள்விகளுக்கு பதிலளிப்பது என்னை இரட்டிப்பு மகிழ்ச்சியாக்குகிறது. இதுவரை இப்படி நான் இயங்கிக் கொண்டிருக்க நண்பர்களின் ஒருமித்த ஆதரவுதான் முதல் காரணம். மற்றபடி இறைவனிடமும் நீங்கள் வேண்டிக்கொள்ளுங்கள். நானும் தான்."என பதிலளித்திருந்தேன்.

இப்படி தடையில்லாமல் ஓடிக்கொண்டிருக்க வேண்டுமென்பது தான் என் அவா.

அவர் சொன்ன இன்னொரு வார்த்தையும் நினைவுக்கு வருகின்றது "காரணமில்லாமல் எதுவும் கெடாது"

கணிப்பொறி அறிமுகம் தமிழில் பிடிஎப் பக்கங்கள். Introduction to Computer in Tamil pdf pages Download. Right click and Save.Download


Email PostDownload this post as PDF

Tuesday, July 01, 2008

சில கணிணி சட்டாம்பி டிப்ஸ்

கணிணி சட்டாம்பிகளை பார்த்திருப்பீர்களானால் அவர்களின் விரல்கள் தட்டச்சுப்பலகையின் மேல் மின்னல்வேகத்தில் சுழன்றடிக்கும் அதேவேளையில் திரையில் காரியம் முடிந்திருக்கும். வியப்பாய் நாம் பார்த்துக்கொண்டு நிற்போம். மூன்று நிமிடத்தில் நாம் செய்வதை அவர் மூன்றே நொடியில் செய்து முடிப்பார். எல்லாம் தட்டச்சு குறுக்கு வழிகளின் உபயம் தான். நீங்கள் இந்த சிற்சில கீபோர்டு குறுக்குவழிகளை தெரிந்து வைத்திருந்து அதை அவ்வப்போது பழக்கப்படுத்தி வந்தால் ஒருநாள் நீங்களும் கணிணி சட்டாம்பி தான்.










ஏதாவது .com என முடியும் தளம் போகவேண்டுமா? like www.yahoo.com , just type yahoo in address bar and hit ctrl + enter

ஏதாவது .net என முடியும் தளம் போகவேண்டுமா? like www.yahoo.net , just type yahoo in address bar and hit Shift + Enter

ஏதாவது .org என முடியும் தளம் போகவேண்டுமா? like www.yahoo.org , just type yahoo in address bar and hit ctrl + shift + Enter

Ctrl-லை அழுத்தியவாறே + அழுத்தினால் எழுத்துரு பெரிதாகிக்கொண்டேவரும்.தெரியுமா?
Ctrl-லை அழுத்தியவாறே - அழுத்தினால் எழுத்துரு சிறிதாகிக்கொண்டேவரும்.தெரியுமோ?

Ctrl-லை அழுத்தியவாறே a அழுத்தினால் அது அனைத்தையும் தெரிவு செய்யும்
Ctrl-லை அழுத்தியவாறே c அழுத்தினால் அது தெரிவு செய்தவற்றை காப்பி செய்யும்
Ctrl-லை அழுத்தியவாறே x அழுத்தினால் அது தெரிவு செய்தவற்றை கட் செய்யும்
Ctrl-லை அழுத்தியவாறே v அழுத்தினால் அது மேலே நீங்கள் தெரிவு செய்தவற்றை பேஸ்ட் செய்யும்
Ctrl-லை அழுத்தியவாறே ESC அழுத்தினால் Start menu திறக்கப்படும்.

Alt-ஐ அழுத்தியவாறே F4 அழுத்தினால் உங்கள் முன்னால் உள்ள விண்டோ மூடப்படும்.
WINDOWS KEY -ஐ அழுத்தியவாறே D அழுத்தினால் உங்கள் முன்னால் உள்ள எல்லா விண்டோஸ்களும் மினிமைஸ் செய்யப்பட்டு டெஸ்க் டாப் மட்டுமே தெரியும்.
WINDOWS KEY -ஐ அழுத்தியவாறே F அழுத்தினால் Find files திறக்கும்.
F3 அழுத்தினால் Find திறக்கும்.
F5 அழுத்தினால் refresh ஆகும்.
Alt-ஐ அழுத்தியவாறே tab அழுத்தினால் திறக்கப்பட்டிருக்கும் அப்ளிகேசன் விண்டோஸ்களிடையே உலாவரலாம்.

shift-ஐ அழுத்திக்கொண்டு down or up key அழுத்தினால் அது குறிப்பிட்ட வரிகளை மட்டும் தெரிவு செய்யும்.
shift-ஐ அழுத்திக்கொண்டு page down or page up அழுத்தினால் அது குறிப்பிட்ட முழு பக்கங்களையும் தெரிவு செய்யும்.

Tab-ஐ தட்டுவது 8 spaces தட்டுவதற்கு சமானமாகும்.

Start->run -ல்
... (மூன்று புள்ளிகள் டைப்பினால்) My Computer திறக்கப்படும்
.. (இரண்டு புள்ளிகள் டைப்பினால்) Documents and settings folder திறக்கப்படும்
. (ஒரு புள்ளி டைப்பினால்)User Profile திறக்கப்படும்

WINDOWS KEY -ஐ தட்டி அப்புறம் L-வை தட்டினால் உங்கள் கணிணி லாக் ஆகிவிடும்.
WINDOWS KEY -ஐ தட்டி அப்புறம் U-வை தட்டினால் உங்கள் கணிணி ஷட்டவுன் செய்யவாவென கேட்கும்.

இப்படி ஒவ்வொன்றாய் முயன்றுபாருங்கள் எல்லாமே சாத்தியம். சித்திரமும் கைப்பழக்கம். செந்தமிழும் நாப்பழக்கம்.

உபயோகமான சில Pdf-கள்
Computer Shortcuts Quick Reference Guide
Windows XP Keyboard Shortcuts

சட்டம் போடும் பிள்ளை தான் சட்டாம் பிள்ளையாகி பின் சட்டாம்பியாகி விட்டதாக கோபால் சொன்னான்.

ஆத்ம ஞான இரகசியங்கள் இங்கே தமிழில் சிறு மென் புத்தகமாக. Aathma Jana Ragasiyankal - Secrets of the Undiscovered Self in Tamil pdf ebook Download. Right click and Save.Download


Email PostDownload this post as PDF
Related Posts Plugin for WordPress, Blogger...

சமீபத்திய பின்னூட்டங்கள்