உங்கள் கேள்விகளை இங்கே பதிவு செய்யுங்கள்

From Blog.PKP.in

Tuesday, August 26, 2008

நேரடி ஒளிபரப்பு செல்போனிலிருந்து

தன்னை சுற்றியுள்ள சூழலின் தாக்கம் எழுதுபவனில் எழுத்துக்களில் எப்படியாவது தெறித்துவிடும் என்பது எத்தனை நிஜம். யாரோடைய எழுத்துக்களையாவது விடாது பின் தொடர்ந்து படித்துக்கொண்டிருந்தால் உங்களுக்கு அது புரியும். தூரத்தில் எங்கோ இருந்து எழுதும் அந்த எழுதுபவனில் உள்ளேயும் வெளியேயும் நிகழும் சலனங்கள் உங்களையும் வந்து எட்டும். அப்படித்தான் என்னைச் சுற்றி நிகழும் நிகழ்வுகளும் சம்பவங்களும் என் எழுத்துக்களை சில சமயம் வேறு திசையில் திருப்பிச் சென்றுவிடுகின்றன. எனினும் சில நொடிகளை வீணாக்கி என்னை வாசிக்க வருபவர்களுக்கு கொஞ்சமேனும் உருப்படியாய் எதாவது கொடுக்க வேண்டும் என்பது தான் என் அவா.

நண்பர் செல்வா எழுதியிருந்தார், "என்ன பிகேபி, நீங்க இப்போ அதிகமா ஐபோன் மேட்டர சொல்லுறீங்க .ஸோ நீங்க ஐபோன் வாங்கிட்டீங்களோ :)" வென.
பாருங்கள், எப்படி என் எழுத்துக்கள் என்னை காட்டிக் கொடுக்கின்றன.

இந்த ஐபோன் மேளாவின் கடைசியாய் நான் தெரிந்து கொண்ட ஒரு சுவாரஸ்ய விசயத்தை மட்டும் இங்கே உங்களுக்கு சொல்லிவிடலாமென்றிருக்கின்றேன்.

போகக்கூடாத இடமொன்றிற்கு போய் இருக்கின்றீர்கள் என வைத்துக்கொள்வோம். கேர்ள் ஃபிரண்டிடமிருந்து செல்போன் கால் வருகின்றது. "டர்ன் ஆன் த கேமரா டியர். உன்னை பார்க்கணும் போல ஆசையாய் இருக்கு"
பகீர் என்றிருக்கும் உங்களுக்கு.

ஆனால் அவளோ வீட்டில் தன் கணிணியில் உங்கள் வலைப்பக்கத்தையே வெறித்து பார்த்துக்கொண்டிருப்பாள். உங்கள் செல்போன் கேமரா நீங்கள் படம்பிடிப்பதற்கேற்ப உங்கள் சுற்றுபுறத்தை படம் பிடித்து அதை உடனுக்குடன் ஸ்டிரீம் பண்ணி இணையத்தில் ஏற்றி அதை உங்கள் வலைப்பக்கத்தில் காட்டிவிடும். ஏடாகூடாமாகிப் போய்விடுமேப்பா என்கின்றீர்களா. ஆமாம் அதுவும் இப்போது சாத்தியம்.

அதாவது இன்ஸ்டன்ட் வெப்கேமாக இணையத்தில் உங்கள் செல்போன் கேமராவை வேலை செய்யவிடலாம்.

லேபர்டே ஹாலிடேஸ் வருகின்றது. சிக்காகோவிலிருந்து Cedar Point பூங்காவரைக்கும் போகும் முழு டிரிப் மற்றும் அங்கே வாட்டர் பார்க்கிலும் ரோலர்கோஸ்டரிலும் நாங்கள் கிறங்குவது அத்தனையையும் என்னால் லைவாய் அதாவது நேரடியாய் என் செல்போன் கேமராமூலம் இணையத்தில் ஒளிபரப்பு செய்ய இயலும்.

இந்த 3ஜி அலைவரிசையால் இப்படி நல்லதும் இருக்கு கெட்டதும் இருக்கு.
எல்லோரும் twitter ஆனது போல் இனி எல்லோரும் Qikker ஆகலாம்.
உங்கள் செல்போனில் இந்த வசதியை கொண்டுவரலாமாவென கீழ்கண்ட சுட்டியை பார்த்து தெரிந்துகொள்ளுங்கள்.
Phones qik support list.
மேலும் விவரங்களுக்கு http://qik.com

எதற்கும் இப்போதே கேமரா இல்லாத செல்போனாய் பார்த்து ஒன்று வாங்கி வைத்திருக்க முடிவெடுத்திருக்கின்றேன்.

பிரபல தமிழ் சிறுகதைகள் தொகுப்பு இங்கே சிறு மென் புத்தகமாக. Popular Tamil Short Stories pdf ebook Download. Right click and Save.Download


Email PostDownload this post as PDF

Sunday, August 24, 2008

ஏதோ ஒரு பாட்டு

நம் குரல்தனை எழுத்துக்களாக மாற்றும் speech recognition நுட்பம் வளர்ந்துகொண்டிருப்பது நம் அனைவருக்கும் தெரிந்ததே. ஆனாலும் அது இந்த அளவுக்கு வளர்ந்துவிட்டிருப்பது எனக்கு தெரிந்திருக்கவில்லை.

FM-ல் ஒரு ஆங்கிலப்பாடலை கேட்கின்றோம். ஏனோ அது பிடித்துபோய்விட்டது. நம்மை அறியாமலே நாம் அதை முணுமுணுக் கொண்டே வீடு வருகின்றோம். கவுச்சில் (Couch) உட்காரும் போது மீண்டும் அந்த பாடல் நினைவுக்கு வருகின்றது. இன்னொரு முறை அந்த இனிய இசையை கேட்டால் நன்றாய் இருக்கும் போல் தோன்றுகின்றது. ஆனால் அது என்ன பாடல், யார் பாடியது, எந்த ஆல்பத்திலிருந்து என ஒன்றுமே தெரியாது உங்களுக்கு. என்ன செய்வது இப்போது?

மிடோமி (midomi) உங்களுக்கு உதவுகின்றது. நீங்கள் செய்ய வேண்டிதெல்லாம் மிடோமி இணையதளம் போய் அந்த பாடலை 10 நொடிகள் பாடி அல்லது hum-மி காண்பியுங்கள். அவ்வளவுதான். அவர்கள் அந்த பாடலை தேடி உங்களுக்கு கண்டுபிடித்து தருகின்றார்கள். என்னமோ MARS அதாவது Multimodal Adaptive Recognition System என்றொரு தொழில் நுட்பமாம்.இந்த அட்டகாச வேலைகளையெல்லாம் செய்கின்றது. டிவியில் ஓடிக் கொண்டிருக்கும் பாடல் என்னப் பாடல் என கண்டுபிடிக்க மிடோமியிடம் சில செக்கண்டுகள் ரெக்கார்டு பண்ணி காட்டினாலே போதும் நொடியில் அது அந்த பாடல் பற்றிய முழு ஜாதகத்தைம் வைத்துவிடுகின்றது. iPhone-னிலும் இது கையடக்க பயன்பாடாய் இலவசமாய் கிடைக்கின்றது.

http://www.midomi.com

Backstreet Boys-ன் "Show me the meaning" பாடலை எனது கனகனத்த குரலில் பாடிக்காண்பித்தேன். மிடோமி உடனே அதை கண்டுபிடித்து விவரத்தை தெரிவித்ததோடல்லாமல் அந்த பாடலின் யூடியூப் வீடியோக்கான சுட்டியையும் கொடுத்து அசத்தியது. ஆச்சரியமாய் இருந்தது.

இது போல தமிழிலும் வர இன்னும் கொஞ்சநாள் தவம் இருக்கவேண்டும்.

அப்போது நாம் இருமினாலும் தும்மினாலும் அது யாருடைய இருமல் யாருடைய தும்மல் என கணிணியார் கரேட்டாக கண்டுபிடித்துச்சொல்வார்.

விதைகள் கிறிஸ்தவ தமிழ் மென்நூல்.Vithaikal Christian Tamil pdf ebook Download. Right click and Save.Download


Email PostDownload this post as PDF

Thursday, August 21, 2008

சிறு துளிகள்


இணையம் வந்தாலும் வந்தது இன்றைக்கு அங்கு பணம் சம்பாதிக்க பலமார்க்கங்கள் இருக்கின்றன. அதற்காக நாம் சும்மா இருந்தால் போதும் அது கொட்டிக்கொடுக்கும் கற்பகதரு என்றர்த்தமில்லை.விற்க உங்களிடம் ஏதாவது ஒரு சரக்கு இருக்கவேண்டும். வாங்குவதற்கு உலக அளவில் வாடிக்கையாளர்கள் இருக்கின்றனர். சமீபத்தில் நான் கண்ட ஒரு உதாரணத்தையே இங்கும் உங்களுக்கு எடுத்துக்காட்டாக்க விழைகின்றேன்.

மீண்டும் இந்த ஐபோனை பற்றியே இங்கு பேசுவதால் கோபித்துக்கொள்ள வேண்டாம். இந்த ஐபோனின் ஒரு மிகப்பெரிய பாஸிட்டிவ் பாயிண்ட் அதன் SDK அதாவது Software Developement Kit. இந்த மென்பொருள் கிட்டை வைத்து ஐபோனுக்கான பயன்பாட்டு மென்பொருள்கள் பலவற்றை மினி மினியாக ஒருவர் இஷ்டத்துக்கு தயார் செய்து கொள்ளலாம். என்ன, கொஞ்சம் Objective C மொழி தெரிந்திருக்க வேண்டும். மேலும் ஒரு Mac-OS X உள்ள கணிணிப்பொறி மற்றும் ஒரு ஐபோன் தேவைப்படும். அருமையான, பலருக்கும் பயன்படும் ஒரு சிறுபயன்பாட்டை படைத்து அதை ஆப்பிள் அப்ளிகேஷன் ஸ்டோரில் விலைக்கு வைத்தால் கூவிக் கூவி நாம் விற்கத்தேவையில்லை. இன்றைக்கு மில்லியன்கணக்கில் ஐபோன்கள் மார்கெட்டில் உள்ளன. இதில் ஒரு சொற்ப சதவீதத்தினருக்கு மட்டும் டாலர் ஒன்றுக்கு உங்கள் அப்ளிகேசனை விற்றாலும் கொடிகட்டிப் பறக்கலாம்.

அப்படியே Apple App Store-ல் மேய்ந்து வந்த போது ஒரு தமிழ் பெயர் அடிபட்டது. முத்து ஆறுமுகம் (Muthu Arumugam).திண்டுக்கல் அருகே காட்டுப்புதூர் என்ற குக்கிராமத்திலிருந்து படித்து வெளியேறியவர்.இவர் தானே டெவலப்செய்த TamilDaily எனும் ஒரு iPhone அப்ளிகேஷனை $0.99-க்கும் Upcoming Plus எனும் ஒரு அப்ளிகேஷனை $1.99-க்கும் அங்கு விற்றுவருகின்றார். மகிழ்ச்சியாய் இருந்தது. யாருக்குத் தெரியும் அந்த சிறு துளி சிறு துளிகள் சேர்ந்து பெரு வெள்ளமாகலாம். புரோகிராமிங் படிச்சு தொலச்சோமில்லையேனு வருத்தமாயிருந்தது.

செம்மல் நபியைக் காணச்செல்வோம் எனும் இஸ்லாமிய தமிழ் மென்னூல் இங்கே உங்கள் இறக்கத்துக்காக. Chemmal Nabiyai Kaanach Selvoom Islamic Tamil ebook in pdf format Download. Right click and Save.Download


Email PostDownload this post as PDF

Tuesday, August 19, 2008

திருத்தப்படும் நிஜங்கள்

டிஜிட்டல் யுகத்தின் இன்னொரு மாயை இந்த போட்டோஷாஃபிங். ஃபார்வேர்டு மெயில்களில் நிஜமென வரும் படங்களில் பெரும்பாலானவை போட்டோஷாப்போ அல்லது பிற இலவச போட்டோ எடிட்டர்கள் வைத்தோ அருமையாக எடிட்செய்யப்பட்டவையே.எளிதில் நாம் பொய்யென முடியாது.அப்படியேத்தான் திருமண தகவல் தளங்களிலும். போட்டோவை பார்த்துவிட்டு மட்டும் ஏமாந்துவிடக்கூடாது. நம்மாட்கள் படங்களில் டச்சப் கொடுப்பதில் சமர்த்தர்.பெரும் கார்ப்பரேட்டுக்காக வேலைப்பார்க்கும் விளம்பர டிசைனர்களை விட இது மாதிரியான அமெச்சூர் போட்டோஷாப் கலைஞர்கள் வித்தகர்களாய் இருக்கின்றார்கள்.

கீழே பாருங்கள் சில பெருசுகளின் போட்டோ எடிட்டிங் திறமையை

Time பத்திரிகை வரைந்த மெக்கெயினின் கை. இது ஒரு புது விதமான ஸ்டைலாம். நாம் ஒத்துக்க வேண்டியதுதான்.


Tommy Hilfiger-ன் விளம்பரம்.அந்த பெண்ணின் இடதுகால் எங்கே போச்சுப்பா?


Kmart ஃப்ளையரில் சிறுவனை குறுக்கேவெட்டிய கொடுமை.


KFC-யின் கேவலமான சிக்கன் பக்கெட் போட்டோ ஒட்டல். நன்றாக உற்றுப்பாருங்கள் தெரியும்.


Microsfot-ன் தடம் மாறிய ஓடு தளம்.


Gap-ன் போட்டோஷாப் திறமை.


இந்த பொதுஜன பிரபல போட்டோ எடிட்டிங் டிரெண்ட் அரசியலிலும் புகுந்து சர்ச்சையை அவ்வப்போது கிளப்புவது இன்னொரு நவீன நோக்காடு. சில மாதங்களுக்கு முன் ஈரான் ஏவுகணை சோதனை செய்ததாக வெளியான அந்த மூன்று ஏவுகணைகள் சீறிப்பாயும் படம் பிரபல நாளிதழ்களிலெல்லாம் முதற்பக்கத்திலேயே வெளியானது.அப்புறமாகத்தான் யாரோ கண்டுபிடித்தார்கள். அந்த படம் எடிட்செய்யப்பட்டது என்று.என்ன செய்வது. அரசியலில் இதெல்லாம் செய்யவேண்டியிருக்கின்றது.

எடிட்செய்யப்பட்டு வெளியானதும்

நிஜமும்


இங்கே மட்டும் என்ன வாழுதாம். இரட்டைகோபுர விமானத்தாக்குதல் வீடியோவில் விமானம் ஒன்று ஒரு கோபுரத்தில் மோதி அதன் மூக்கு எந்த பாதிப்பும் இன்றி மற்ற பக்கத்தில் வெளிவருகின்றது.அது என்ன மாயம் என இன்னொரு சாரார் கேள்வி எழுப்புகின்றனர்.

நிஜமாகவே நிஜம் இக்காலங்களில் எங்கும் அபூர்வமாகிவருகின்றது.

குடந்தை ஸ்யாமா சதுரகிரி யாத்திரை ஆன்மீகப்புத்தகம் இங்கே தமிழில் சிறு மென் புத்தகமாக. Kudanthai Syaama Sathuragiri Yaathirai in Tamil pdf ebook Download. Right click and Save.Download

Sathuragiri temple location on google map
Sathuragri Mahalingam Temple located near mallapuram border of madurai,virudhunagar districts. 18 siddhars caves, mahalingam, santhana lingam (lord sivas) temples are located in forests.


Email PostDownload this post as PDF

Monday, August 18, 2008

ஐ.டி சரீரங்கள்

கொலஸ்ட்ரால் பிரச்சனையும், பிளட் பிரஸர் பிரச்சனையும் ஐ.டி காரர்களுக்கேயான ஒரு பிரதான பிரச்சனை. போனமுறை மருத்துவரிடம் ஜெனரல் செக்கப் சென்றபோது கொலஸ்ட்ரால் கொஞ்சம் அதிகமாயிருக்கு சார், கொஞ்சம் வொர்க்அவுட் பண்ணுங்களேன்னு ஆலோசனை கொடுத்தார். இலங்கைத் தமிழர் அவர். மருத்துவம் படித்து அமெரிக்கா வரைக்கும் வந்து இங்குள்ள தொல்லைபிடித்த தேர்வுகளையெல்லாம் எழுதி பாஸ்செய்து மருத்துவராகி இருக்கின்றார். இப்படி நம்மிடையேயிருந்து இங்கு வந்து சாதித்த சாதாரணமானவர்கள் இங்கு அநேகம். கேட்டால் தோல்வியில் துவண்டுவிடாமல் வாய்ப்புக்காக எப்போதும் விழித்தே இருக்கவேண்டும் என்பார்.

கொலஸ்ட்ரால் பிரச்சனையை சமாளிக்க ஓட்ஸ் சீரியலுக்கும் ஆலிவ் எண்ணைக்கும் தற்காலிகமாக மாறியிருக்கின்றேன்.
சர்க்கரையிலிருந்து இன்னும் கொஞ்சநாட்கள்கூட தப்பித்திருக்கலாமென யாரோ ஐடியா சொன்னதால் இரவு சாதம் சாப்பிடுவதை நிறுத்தியாயிற்று. ரொட்டி, சப்பாத்தி இல்லையென்றால் கோதுமை நூடுல்ஸ்.
தினமும் ஒரு ஆப்பிளும் வாழைப்பழமும் சாப்பிடுவது கூட நல்லதாம்.
காலையில் வெறும் வயிற்றில் நிறைய தண்ணீரும் முக்கியம்.
இப்போது சம்மர். இருள்வர ஒன்பது மணியாகின்றது. அதனால் மாலையில் கும்பலாய் கிரிக்கெட் ஆட முடிகின்றது. வேர்க்க வேர்க்க பூங்காவில் நடக்க முடிகின்றது. ஆனாலும் எவன் துப்பாகிவைத்திருப்பானோ என்ற பயமும் உண்டு. குளிரத் தொடங்கியவுடன் ஜிம் கண்டிப்பாக செல்லவேண்டும்.

சில மென்பொருள் எஞ்சினியர்களுக்கு நேர்ந்த சம்பவங்கள் ஏனோ இங்கு நினைவுக்கு வந்து தொலைக்கின்றது. அபசமாய் இங்கு நான் சொல்ல விரும்பவில்லை.

ஆமாங்க இந்த டிவியும் கம்ப்யூட்டரும் நம்மை மெல்ல மெல்லக் கொல்கின்றதாம். வியர்வை வெளியேறுவதில்லையே தவிர மூளை கன்னாபின்னாவென உழைக்கின்றதே. அதிலும் சவாலான வேலை வந்துவிட்டால் நேரம் காலம் பார்க்காமல் தொடர்ச்சியாய் நம் மூளையை இயக்குகின்றோம். நம்மில் அநேகம் பேருக்கு அங்கு சம்பளம் தெரிவதில்லை சவால் தான் கண்முன்னே தெரியும். அதனால் தானே நம் ஆட்கள் அதில் நம்பர் ஒண்ணாய் இருக்கின்றார்கள்.

ஐ.டியிலிருந்து சம்பந்தம் வருகிறது என்றாலே நம்மூர் பெண்கள் அலறுகின்றார்களாம்.இது சாப்ட்வேர்காரர்கள் எதிர்நோக்கும் இன்னொரு பிரச்சனை.கம்யூட்டரே கதியென கிடப்பானாம் அவன்.
கணவனும் மனைவியும் ஐ.டியிலேயே இருந்தால் சப்தமும் இருக்காது சண்டையும் இருக்காது. ஆளுக்கொரு லேப்டாப்பில் மூழ்கிவிடுவார்கள்.Google talk-ல் Goodnight சொல்லிக்கொள்வார்கள்.

மாதம் ஒருமுறை வழக்கமாய் அலுவலகம் வந்து உட்காரும் அந்த செவிலியம்மா போன வாரம் வந்திருந்தார்கள். அப்படியே ஒரு ஓரத்தில் அமர்ந்து ஆர்வமுள்ளோருக்கு பிளட் பிரசர் செக் செய்வது அவர்கள் வழக்கம். எனது கையை பிடித்து ஒரு பம்பை அழுத்தி சோதித்து little above normal என்றார்கள். "ரொம்ப டென்சன் ஆகாதீங்க, ரொம்ப யோசிக்காதீங்க, நல்லா தூங்குங்கனு" அறிவுரை கொடுத்தார்கள்.

கோபாலும் அதை ஆமோதித்து "ம்" கொட்டினான்.
"ரொம்ப பதிவுகள் எழுதி உடம்பை கெடுத்துக்காத" என்றான்.

அமரர் கல்கியின் படைப்பு மோகினித்தீவு இங்கே தமிழில் சிறு மென் புத்தகமாக. Kalki Mohini Theevu in Tamil pdf ebook Download. Right click and Save.Download


Email PostDownload this post as PDF

Saturday, August 16, 2008

மூன்று வாலட்டுகள்

நமது வலைப்பதிவுக்கு அவ்வப்போது வருகை தரும் நண்பர் வடுவூர் குமார் பெரும்பாலான நமது பதிவுகளில் சும்மாவாச்சும் தனக்கு தோன்றுவதை இரு வரிகளில் பின்னூட்டமாக இட்டுச் செல்வார். அதில் அவருக்கு ஒரு திருப்தியோ என்னவோ? அப்படி இட்டு இட்டு இன்றைக்கு அவர் நமது வலைப்பதிவில் முதல்முறையாக சென்சுரி போட்டுள்ளார். அவருக்கு என் நன்றிகள். நண்பர் தமிழ்நெஞ்சம் அவர்கள் இருவேறு ஐடிகளில் பின்னூட்டம் இட்டுச் செல்வதுண்டு. இரண்டையும் சேர்த்தால் நூறையும் தாண்டும். அவருக்கும் என் நன்றிகள்.தன்னம் தனியே பிரயாணிப்பதை விட இது போன்ற சகப்பயணிகளுடன் சேர்ந்து சம்சாரித்துக் கொண்டே பயணித்தல் தூக்ககலக்கத்தை போக்குகின்றது.

"இரண்டு விவரணப்படங்கள்" என்ற எனது முந்தைய பதிவில் இரு டாக்குமென்டரி வீடியோக்களை அறிமுகப்படுத்தியிருந்தேன்.

LAV enkat எழுதியிருந்தார்,Dear Mr.PKP,I am regular reader of your blog and GREAT job done. I like your simple writings so anyone can understand. However today this blog I couldn't understand at all. Can you explain in more detail so everyone understand.Thankx.

நன்றி LAV enkat!! கொஞ்சம் குழப்பிவிட்டேனோ?

Zeitgeist என்ற விவரணப்பட வீடியோவின் மூன்றாம் பாகத்தை நீங்கள் பார்த்திருந்தீர்களானால் நான் சொல்ல வந்தது உங்களுக்கு புரிந்திருக்கலாம். நான் அங்கு குறிப்பிட்டுச் சொன்ன "அந்த தொழில் நுட்பம்" நாம் இங்கு ஏற்கனவே பேசிய "RFID" -தான். சீக்கிரத்தில் இந்நுட்பம் சக்கைபோடு போடப்போகின்றது பாருங்கள். இது பற்றிய எனது முந்தைய பதிவு இதோ. "மனிதனுக்குள் ஒரு சிப்" ஒரு நிமிடம் இந்த சுட்டியை சொடுக்கி அப்பதிவை படித்து விட்டு மீண்டும் இப்பதிவை தொடர்தல் நல்லது.

சந்தேகமே இல்லாமல் இது ஒரு scary-யான தொழில் நுட்பம்தான். ஆயிரம் அருமைகள் இருந்தாலும் இதனால் மனிதனின் பிரைவஸி மற்றும் சுதந்திரம் காணாமல் போய்விடும் வாய்ப்புகள் அதிகம். ஆனால் திரண்டு வரும் தொழில் நுட்பமுன்னேற்றங்களை யாரால் தடுக்க இயலும்.

இதில் ஆச்சரியம் என்னவென்றால் நம்மில் பலரும் இந்த Radio-frequency identification எனப்படும் RFID தொழில் நுட்பத்தை ஏற்கனவே தாங்களே அறியாமல் பயன்படுத்தி வருகின்றார்கள். கோபாலிடம் நீயும் பயன்படுத்துகிறாய்டா என்றேன். "வாட்" என்றான். அவன் பயன்படுத்தும் கிரெடிட் கார்டு ஒன்று இந்த RFID சிப் நிறுவப்பட்டது. எதிர்கால கடனட்டைகள் இந்தமாதிரி ஒரு சிப்பை உள்ளடக்கியே வருமாம். இந்த சிப் உங்கள் கடனட்டை பற்றிய தகவகள் அனைத்தையும் கொண்டிருக்கும். இதில் ஒரு சிக்கலும் இருக்கின்றது. டன்கின்டோனட்ஸ் வரிசையில் நிற்கும் கோபாலருகே தனது பாக்கெட்டில் RFID scanner வைத்திருக்கும் ஒரு ஹேக்கர் நெருங்கினால் அந்த RFID scanner-ஆல் இவன் கிரெடிட் கார்டு தகவல்களை வயர்வெஸ்ஸாய் படிக்க முடியும்.இந்த அலைவரிசை தொடர்பை தடுக்கத்தான் புதிதாக ஒருவித பர்ஸை சந்தையில் அறிமுகப்படுத்தியிருக்கின்றார்கள். அதன் பெயர் RFID Blocking Wallet.என்னமோ அதில் alloy shielding material இருக்கிறதாம். அது அந்த அனாவசிய ஸ்கேனர்கள் படிக்கமுடியாமல் சுவர்போலிருந்து தடுத்துவிடுமாம்.

நீங்கள் படத்தில் காண்பது போல் சிவப்பு வட்டமிட்டது போன்ற குறிகள் உள்ள கடனட்டை பயன்படுத்துவோராயின் அது RFID கொண்டது என தெரிக.


தனது கிரெடிட் கார்டுகளை வரிசையாய் அடுக்கி வைத்துப் பார்த்து "நான் தப்பித்தேன்பா" என்றாள் பரிமளா.

"இல்லை" என்றேன் நான். திகிலுடன் என்னை பார்த்தாள்.

விளக்கினேன்.

"உன்னைப் பார்த்தால் இந்தியப்பெண் போல இருக்கின்றாய், பேச்சுக்கொடுத்தால் அமெரிக்க ஜாடை வீசுகின்றது, வைத்திருக்கும் புத்தகங்களோ ஃப்ரெஞ் தலைப்பிட்டவை, கேட்கும் பாடல்கள் எல்லாம் அரபிக் இதெல்லாம் குழப்புபவைதான். ஆனாலும் RFID scanner வைத்திருக்கும் அந்த ஹேக்கர் உன்னை நெருங்கினால் எளிதாய் அவன் சொல்வான் நீ அமெரிக்க பிரஜை என்று. எப்படி என கேட்கின்றாயா? நீ வைத்திருக்கும் அமெரிக்க பாஸ்போர்டில் RFID இருக்கின்றது" என்றேன்.

நேகாவுக்குமாய் சேர்த்து மூன்று வேலட்கள் ஆர்டர்பண்ணியிருக்கின்றோம்.

அருணா நந்தினியின் புதினம் "பார்த்த முதல் நாளே" இங்கே தமிழில் சிறு மென் புத்தகமாக.Aruna Nanthini Novel "Paartha Muthal Naalea" in Tamil pdf ebook Download. Right click and Save.Download


Email PostDownload this post as PDF

Thursday, August 14, 2008

ஆடியோ ரெக்கார்டிங்

சில இசைத்தளங்களில் ஸ்டிரீமிங் ஆடியோ வைத்திருப்பார்கள். பாடல்களை கேட்கமட்டுமே செய்யலாம். ஆனால் MP3-யாக அவற்றை இறக்கம் செய்ய முடியாது வென்றிருக்கும். அதனால் நாம் ஆன்லைனில் இருக்கும் போது மட்டுமே அப்பாடல்களை கேட்கலாம். ஆஃப்லைனிலோ அல்லது CD பிளயர்வழியோ அந்த உங்கள் அபிமான பாடல்களை கேட்கமுடியாது. இது போன்ற சமயங்களில் உங்களுக்கு உதவுவதுதான் ஆடியோ ரெக்கார்டிங். உங்கள் ஸ்பீக்கரில் ஒலிக்கும் எல்லா ஒலியையும் நீங்கள் MP3-யாக பதிவு செய்யும் வசதி உங்கள் கணிணில் உள்ளது தெரியுமோ?

விண்டோஸ் எக்ஸ்பியிலுள்ள Accessories ->Entertainment ->Sound Recording சுத்த வேஸ்ட். அதனால் 60 நொடிகள் தான் ஒலி பதிவு செய்ய இயலும்.

உங்களுக்கு தேவை ஆடசிட்டி. இந்த இலவச மென்பொருளை முதலில் நீங்கள் இறக்கம் செய்து உங்கள் கணிணியில் நிறுவுங்கள்.
Download Audacity

பின் நீங்கள் ஆடசிட்டியில் ரெக்கார்டு செய்ய முயலும் போது அதுவே கேட்கும் LAME DLL-ஐ (Lame Aint an MP3 Encoder) கீழ்கண்ட சுட்டியிலிருந்து இறக்கம் செய்து வைத்துக் கொள்ளுங்கள்.
Download lame_enc.dll

மறக்காமல் Audacity-ல் மேலே படத்தில் கண்ட படி Stereo Mix-ஐ தெரிவுசெய்து கொள்ளுங்கள். Edit -> Preferences -> Audio I/O-ல் உங்கள் சவுண்ட் கார்டு தெரிவுசெய்யபட்டிருக்க வேண்டும். அவ்ளோதான்.

இசையை ஓட விட்டதும் அந்த சிவப்பு பொத்தானை அழுத்துங்கள். ரெக்கார்டிங் ஸ்டார்ட் ஆகிவிடும்."Export as MP3" யை செலக்டி MP3 ஆக சுட்டுவிடலாம். Thats easy.

(Updated: நண்பர் எம்.ரிஷான் ஷெரீப் பரிந்துரைக்கும் இன்னொரு அருமையான இலவச எளிய மென்பொருள் இங்கே http://getitfreely.co.cc/content/record-internet-radio-embedded-audio)

லஷ்மியின் புதினம் "நிற்க நேரமில்லை" இங்கே தமிழில் சிறு மென் புத்தகமாக. Lakshmi Nirka Neram Illai Novel in Tamil pdf ebook Download. Right click and Save.Download


Email PostDownload this post as PDF

Wednesday, August 13, 2008

இரண்டு விவரணப்படங்கள்

டிவிடி பிளயரிலுள்ள USB போர்ட்டில் நேரடியாக ஒரு பென் டிரைவை இணைத்து டிவியில் மூவி பார்க்கின்றோம். காரின் AUX ஆடியோ input-ல் கேபிளை நுழைத்து கையிலிருக்கும் ஐபாடு பாட்டு ஒன்றை காரு அதிர கேட்கின்றோம்.Majic Jack-க்கை இந்திய கணிணி ஒன்றில் இணைத்து அமெரிக்காவுக்கு லோக்கல் கால் செய்கின்றோம்.இப்படி மனதுக்கு இதமான சுகமான அநேக தொழில் நுட்பங்கள் சந்தைகளில் வந்து கொண்டிருந்தாலும் சில நுட்பங்கள் ஏனோ நம்மை பகீரென திகில் பிடிக்கும் வண்ணமும் வைக்கின்றன.அந்த மாதிரியான ஒரு தொழில் நுட்பத்தின் அடுத்த நிலை பற்றிய ஊகத்தை சமீபத்தில் ஒரு டாக்குமெண்டரி திரைப்படம் மூலம் அறிய வந்தேன். நம் வலைப்பூவில் நாம் ஏற்கனவே பேசிய தொழில் நுட்பம் தான் அது என்றாலும் சற்று வித்தியாசமான கண்ணோட்டத்தில் மொத்த மனித குலத்தையே யாருக்கோ அடிமைப்படுத்தும் பாங்கில் மெதுவாக எழும்பிவந்து கொண்டிருக்கின்றது "அந்த நுட்பம்" என்கின்றார்கள்.

மாற்றுக்கருத்துக்களை அடித்துக்கூறும் கான்ஸ்பிரசி தியரிகளில் (Conspiracy Theory) எனக்கு அவ்வளவாய் நம்பிக்கை இல்லாவிட்டாலும் உலகம் போகின்ற போக்கை பார்த்தால் சில சமயம் என்னையும் அறியாமல் சந்தேகம் துளிர்க்கின்றது. இங்கு நான் வழங்கும் இந்த விவரணப்படம் மூன்று பாகங்களை கொண்டுள்ளது. முதல் பாகம் கடந்தகால நிகழ்வொன்றை சந்தேகப்படுகின்றது. இரண்டாம் பாகம் சமகால நிகழ்வொன்றை சந்தேகப்படுகின்றது. எனது அபிமான அந்த மூன்றாம் பாகம் எதிர்காலத்தை பற்றியது. இருக்கையின் விளிம்புக்கே அது நம்மை கொண்டு வந்துவிடுகின்றது. இரண்டு மணிநேர அவகாசமிருந்தால் பொறுமையாய் அமர்ந்து பாருங்கள். ஆங்கில சப்டைட்டிலும் உண்டு. மெதுவாக ஆரம்பிக்கும் அது போகப் போக சூடுபிடிக்கும். வெயிட்டான பல விஷயங்களையும் எளிதாக சொல்லியிருக்கின்றார்கள். (ஏற்கனவே அறிமுகமானோர் தயவுசெய்து மன்னிக்கவும்)

http://video.google.com/videoplay?docid=-1817848131611744924

லைட் வெயிட் பிரியர்கள் இங்கே நடிகர் சிவாஜி கணேசன் பற்றிய 30 நிமிட தமிழ் விவரணப்படத்தை பார்க்கலாம்.
http://media.pkp.in/2007/09/sivaji-ganesan-documentary.html

ரமணிசந்திரன் அவர்களின் புதினம் "ஆசை ஆசை ஆசை" இங்கே தமிழில் சிறு மென் புத்தகமாக. Ramanichandran Aasai Aasai Aasai in Tamil pdf ebook Download. Right click and Save.Download


Email PostDownload this post as PDF

Sunday, August 10, 2008

குயிலப் புடிச்சு கூண்டில் அடச்சு

ஓகோ புரடெக்சன்ஸ் நாகேஷ் சார் போல மலைமேல் கதை தேடிக் கொண்டிருப்பர் நம் மாணாக்கர்கள். என்ன புராஜெக்ட் செய்யலாம், என்ன செய்வதென புரியலையே எதாவது ஐடியாகொடுங்கப்பா எப்படியாவது நாங்கள் அதை செய்து காண்பிக்கின்றோம் என ஐடியா தேடி கொஞ்சம் நாள் குரூப்பாக அலைவார்கள். தேடித்தேடி கடைசியில் புராஜெக்ட் ஒப்படைக்க நாளும் நெருங்கிவிடும் .எங்கிருந்தாவது கிடைக்கும் ஒரு ரெடிமேட் புராஜெக்டை ஒப்புக்கு சமர்ப்பிப்பர். இனியதான அந்த கல்லூரிக் காலங்களும் முடிந்து போயிருக்கும்.

உண்மையில் கூகிள் முதலான பல வெற்றிகரமான கீக்கி ஐடியாக்கள் கல்லூரி மூளைகளில் உதித்து உயர்ந்தனவே.கூர்ந்து நோக்கப்போனால் நம் இன்றைய நுட்பங்களில் கூடத்தான் இன்னும் எத்தனை சிக்கல்கள் இருக்கின்றன.Spam Scam என்று இன்னும் தீர்க்கப்படாத தொல்லைகள் வேறு அதிகம். நம் திருவாளர் பொதுமாஜனத்துக்கும் கொடுக்க வேண்டிய தீர்வுகள் அநேகம். ஆக நம் மாணவர்கள் கண்டுபிடிக்க இன்னும் ஏகப்பட்ட ஃபார்முலாக்களும், புரோட்டோக்கால்களும், அல்காரிதங்களும் இருக்கின்றன. நம் கல்லூரி வாசல்களிலிருந்து அவை இன்னோவேசன்களாக புறப்படவேண்டும். இதெல்லாம் நடக்குமா?

ஐபாடில் கோபால் முணுமுணுத்துக் கொண்டிருந்தான் "குயிலப் புடிச்சு கூண்டில் அடச்சு கூவச்சொல்லுகிற உலகம் மயில புடிச்சு காலை ஒடச்சு ஆடச் சொல்லுகிற உலகம் அது எப்படி பாடுமய்யா இது எப்படி ஆடுமய்யா" என்று. அந்த வரிகளிலிருக்கும் நியாயமும் எனக்கு பட்டது. ஒரு சின்ன வெப்சைட் உருவாக்கக்கூட, அதில் தன் சில பல திறமைகளை காட்ட கூட அந்த மாணாக்கனுக்கு ஒரு டொமைன் பெயர் தேவைப்படும், அப்புறம் தான் உருவாக்கிய தளத்தை ஹோஸ்ட் செய்ய ஒரு Hosting கணக்கு தேவைப்படும் அதுவும் வித் ஒன்றோ அல்லது ரெண்டோ டேட்டாபேஸோடு PHP வசதியும் வேண்டும் அவனுக்கு. பணத்துக்கு எங்கே போவான்.


சமீபத்தில் பதிவுலகில் ஓராண்டை நிறைவு செய்து வெற்றிகரமாக போய் கொண்டிருக்கும் இலங்கையிலிருக்கும் நம் நண்பர் ரிஷான்ஷெரீப்பின் தயவில் http://www.dot.tk தளம் பற்றி அறிய வந்தேன். இங்கே முற்றிலும் இலவசமாக .tk எனும் டொமைன்பெயரை கொடுக்கின்றார்கள்.Yes Register a domain name here. It's FREE! For example: www.mydomain-name.tk

(Updated: You could get a free domain name from here too http://freedomain.co.nr like www.yourname.co.nr)

ஓகே இப்போது இலவச டொமைன் பெயர் கிடைத்தாயிற்று.Hosting-க்கு என்ன பண்ணுவதாம்? இங்கே ஒரு இணையதளம் உங்களுக்கு இலவசமாக ஹோஸ்டிங்கும் தருகின்றார்கள். பாப் அப் விளம்பரங்கள் போன்ற தொல்லைகள் இன்றி. பிரபல cpanel வசதியோடு Database-கள், PHP, FTP மற்றும் Fantastico AutoInstaller வசதியோடு கலக்கல் தான் போங்கள். பளாபளாவென சூடான இணைய தள புராஜெட்கள் செய்து பரிசோதித்து பார்க்க இது ஒரு அற்புதமான இலவச சேவை.http://www.000webhost.com

எனது mydrive போல தானும் அமைக்க ஆசைப்பட்ட நண்பர் சந்தோமது ஒருமுறை என்னிடம் வழி கேட்டிருந்தார். நானும் Autoindex பற்றி சொல்லியிருந்தேன். அவரிடம் Web Hosting Account இல்லாததால் அதை செய்யமுடியாத நிலையிலிருந்தார். இப்போது 000webhost.com வழி அவருக்கு இலவசமாக mydrive வைத்துக்கொள்ள வழி வந்திருக்கின்றது. கூண்டுகெடக்குது சார்.சும்மா பறந்துபோங்க.

வைகோவின் "தணலும் தன்மையும்" தமி்ழ் மென் புத்தகம் இங்கே உங்கள் இறக்கத்துக்காக. Vaiko Thanalum Thanmaiyum Tamil pdf ebook Download. Right click and Save.Download


Email PostDownload this post as PDF

Thursday, August 07, 2008

VOIP தந்திரம்

உலகத்தின் இருமூலைகளில் இருக்கும் இருகணிணிகள் - அவை இணையத்தில் இணைக்கப் பட்டிருந்தால் நாம் குரல்வழி எளிதாக இலவசமாக பேசிக்கொள்ள முடியும். இது நாம் யாவரும் அறிந்த பழைய தொழில்நுட்பமே. அந்த மாதிரியான வாய்ஸ் சாட்டுக்கு MSN Messenger, Yahoo Messenger ,Google Talk, ICQ, Skype முதலான மென்பொருள்கள் உதவுகின்றன. அப்படியே அது வழியாய் நாம் சர்வதேச இலவச கால்களும் செய்யலாம். ஆனால் என்ன இரு முனைகளிலும் கணிணி மற்றும் இணையம் உங்களுக்குத் தேவைப்படும். கணிணி பக்கத்திலேயே அமர்ந்திருக்க வேண்டும்.அது ஒரு தொல்லை.

இன்றைக்கு வெளிவரும் பெரும்பாலான கைத்தொலைப்பேசிகள் ஒரு குட்டி கணிணி போலவே செயல்படுகின்றன. அது வழியாய் இணையம் கூட மேயமுடிகின்றது. லாஸ்ஏஞ்சலசில் நான் எனது ஐபோன் வழி Yahoo Messenger-ல் நுழைய
லண்டனில் நண்பன் பாஸ்கர் அவனது N95 வழி Yahoo Messenger-ல் நுழைய இருவரும் மணிக்கணக்கில் voice chat-ல் பேசிக்கொண்டே இருக்கலாம். இது சர்வதேச அழைப்பாகாது. அதாவது இங்கு நாங்கள் பேசும் போது தொலைப்பேசி நுட்பத்தை (Air time) பயன்படுத்தவில்லை. மாறாக VOIP எனப்படும் இணைய வழி தொடர்பையே பயன்படுத்துகின்றோம். இது உங்கள் Data Plan மீட்டரை தான் கூட்டுமே தவிர தொலைப்பேசி பில்லை அல்ல. அதுவும் இங்கு அமெரிக்காவில் AT&T "unlimited" Data Plan-னை மாதம் $30க்கு தருகின்றார்கள். Data Plan கட்டண கவலையின்றி மணிக்கூர்கணக்கில் பேசிக்கொண்டே இருக்கலாம். ஒரு தகவலுக்கு எடுத்துக்கொண்டால் ஐபோன் வழி ஒருமணி நேரம் பேசினால் 8MB டேட்டா மட்டுமே டிரான்ஸ்பர் ஆகியிருக்குமாம்.

இணைய இணைப்புடன் கூடிய கைப்பேசி இந்தியாவில் உங்களிடம் இருந்தால் நீங்களும் இலவச சர்வதேச கால்கள் செய்யலாம். மறுமுனை நபரிடமும் இணைய இணைப்புடன் கூடிய கைப்பேசி இருக்கவேண்டும்.அது 3G, GPRS, WiFi அல்லது EDGE என எதுவாக இருந்தாலும் பரவாயில்லை.

இது ஒரு அருமையான தந்திரம். சர்வதேச தொலைபேசி சேவை நிறுவனங்கள் பல போன் கார்டுகள் வழி கோடிகோடியாய் பணம் பார்த்துக்கொண்டிருக்கும் போது இதை எப்படி சம்மாளிக்கப்போகின்றார்கள் என தெரியவில்லை.

ஆ,மறந்து விட்டேனே.மேற்கண்ட தந்திரத்தை செய்ய உதவும் மென்பொருளின் பெயர் fring.
உங்கள் கைப்பேசிக்கான சரியான fring மென்பொருளை இலவசமாக இங்கிருந்து இறக்கம் செய்துகொள்ளலாம்.
http://www.fring.com/downloado/

தகவலுக்கு நன்றி: Manikandan R

ஏழாம் வகுப்பு அறிவுரை கதைகள் இங்கே தமிழில் சிறு மென் புத்தகமாக. 7th standard Arivurai Kathaikal in Tamil pdf ebook Download. Right click and Save.Download


Email PostDownload this post as PDF

Tuesday, August 05, 2008

மின்சார விளையாட்டு

நமது இந்த பிகேபி வலைபதிவுக்கு இன்னும் அநேக புதிய நண்பர்கள் வரத் தொடங்கியிருக்கின்றார்கள். ரெகுலராய் வாசித்தும் செல்கின்றார்கள். சொல்ல வந்த விஷயத்தை எளிமையாய் அனைவருக்கும் புரியும் விதத்தில் எழுத வேண்டும் என்பதே எனது முதல் முக்கிய நோக்கம். சில சமயம் எனக்கு சந்தேகம் கூட வந்ததுண்டு. உண்மையிலேயே நான் இலகுவாய் புரியும்படியாய் எழுதுகிறேனா இல்லை சில உயர்மட்ட ரக தமிழ் எழுத்தாளர்கள் போல் ஒன்றுக்கு இரண்டுமுறை படித்தால் மட்டுமே புரியும் படியாய் கடினமாய் எழுதுகிறேனா என்று.

நண்பர் மாயனின் பார்வைக்கு வந்த நம் வலைப்பதிவை வெகுவாய் விமர்ச்சிரித்திருக்கின்றார். அதற்காக ஒரு பதிவே போட்டிருக்கின்றார். "மிக எளிய மொழி நடையில், அருமையான உதாரணங்களோடு பல புதிய தொழில்நுட்பங்களைப் பற்றியும், புதிய கணினி விஷயங்களையும் அருமையாக விளக்குகிறார்..." என சர்ட்டிபிக்கட்டே தந்துவிட்டார் போங்கள். இப்போதைக்கு கொஞ்சம் திருப்தி.

மீண்டும் ஒரு முறை நம் நண்பர்களுக்கு சொல்கின்றேன்.இவ்வலைப்பதிவானது கணிணியில் மற்றும் இணையத்தில் ஆர்வமுள்ள ஆரம்பநிலை நண்பர்களை மட்டுமே கணக்கில் கொண்டு எழுதப்படுகின்றது. வல்லுனர்களுக்கும் வித்தகர்களுக்கும் கொஞ்சம் ஏமாற்றமே மிஞ்சலாம். தயவுசெய்து மன்னிக்கவும்.

பரிமளா கழிந்த முறை இந்தியா வந்திருந்தபோது கொஞ்சம் அசந்துதான் போயிருந்திருக்கின்றாள்.
"பிகேபி, நம்ம ஊரு இப்பல்லாம் முன்னமாதிரி இல்லப்பா. ரொம்பவே முன்னேறிடுச்சுனு" அப்படி இப்படினு நான் வியக்க வியக்க பல கதைகள் சொன்னாள்.
"ஆனால் ஒன்ணே ஒன்ணுதான் நம் ஊரில் எனக்கு பிடிக்கல" என்றாள்.
ஆர்வமாய் என்னது அதுவென கேட்டேன்.
"வீட்டுல A/C இருக்கு பிகேபி, ஃபேன் இருக்கு, ஃபிரிட்ஜ் இருக்கு ஆனா ஒன்ணுமட்டும் இல்ல அது என்னதுனு சொல்லுபாக்கலாம்."என்றாள்.
விழித்தேன்.
"கரண்ட்"என்றாள்.
"ஆமாம் சரியாய் சொன்னாய்.அது நம்மூரில் ஒரு பெரிய பிரச்சனை தான்" என்றேன்.

தப்பிப்பிழைத்த நம் அரசாங்கம் இப்போது அமெரிக்காவோடு ஏதோ அணுபயன்பாட்டில் ஒப்பந்தம் செய்கிறதாம். இனி சீக்கிரத்தில் மின்சாரத்துக்கு தட்டுப்பாடே இருக்காது என ஆற்காட்டிலிருந்து ஆக்ரா வரைக்கும் கதைக்கின்றார்கள். இந்த உலகில் எதுவுமே இலவசமாய் கிடைப்பதில்லை. ஒன்றை இழந்து தான் இன்னொன்றை பெருகின்றோம். என்னத்தை இழந்தோமோ?

பெரும்பாலும் நம்மூரில் மின்சாரம் சீராய் வருவதில்லை. அதிக ஏற்றத்தாழ்வுகளோடு தான் (Surges) வரும்.இம்மின்சாரத்தை நேரடியாக உங்கள் கணிணியில் அல்லது மடிக்கணிணியில் இணைத்தால் அவற்றின் ஆயுசு கம்மியாக வாய்ப்புகள் அதிகம். கண்டிப்பாய் செலவு பார்க்காமல் ஒரு UPS (Uninterrupted Power Supply) அல்லது stabilizer அல்லது குறைந்தது ஒரு Surge Suppressor வழியாவது மின்சாரம் கொடுப்பது தான் நல்லது. தமிழகத்திலிருந்து மனோஜ் தன் மடிக்கணிணி இப்படி மின்சாரம் பாய்ந்து கெட்டுப்போனதை சொல்லி வருத்தப்பட்டான். நீங்கள் உசாராய் இருப்பீர்கள் தானே.

என்.சொக்கனின் லட்சுமி மிட்டல் பற்றிய ஆடியோ புத்தகம் "இரும்புக்கை மாயாவி" இங்கே தமிழில் MP3 வடிவில். N.Chokkan about Lakshmi Mittal "Irumpukkai Maayaavi" Audio book in Tamil MP3 format Download. (Updated) Oops......இந்த அருமையான ஆடியோ புத்தகம் இப்போதும் விற்பனைக்கு உள்ளதால் இந்த சுட்டி நீக்கப்படுகின்றது. இந்த புத்தகத்தை http://www.audible.com -ல் மாதிரி கேட்கலாம் $13.96 க்கு வாங்கலாம்.Tamil என தேடவும். சென்னையில் கிழக்கு பதிப்பகத்திலிருந்தும் பிற புத்தகக் கடைகளிலிருந்தும் வாங்கிக் கொள்ளலாம். தவறுக்கு வருந்துகின்றோம். நாம் ஏற்கனவே சொன்னமாதிரி யாருடைய பிழைப்பிலும் மண்ணை அள்ளிப் போடுவது நமக்கு அழகல்ல.


Email PostDownload this post as PDF

Sunday, August 03, 2008

வலைத்தட்டுக்கள்

சும்மாவாச்சும் இருக்கட்டுமே என Gig கணக்கில் எனது ஹார்ட் டிஸ்கில் சேமித்து வைத்திருந்த மென்பொருள்களையும், தொழில்நுட்ப Pdf புத்தகங்களையும் இப்பொழுதுது பார்க்கும் போது சிரிப்புத்தான் வருகின்றது. ஆறே மாதத்தில் எல்லாமே காலாவதியாகி (Outdated) விடுகின்றன.புதுசு புதுசாய் பதிப்புகள் வர வர அனாவசியமாய் இவை இடத்தைதான் ஆக்கிரமித்துக் கொண்டுள்ளன. அந்த வகையில் நீண்ட காலமாய் சேமித்து வைத்துக் கொள்ளலாம் எனில் சில Evergreen தமிழ் மென்புத்தகங்களையும் சில ஆங்கில பொது மென்புத்தகங்களையும் சொல்லலாம். மேலும் என்றைக்கு கேட்டாலும் இனிக்கும் சில MP3 க்கள்,எத்தனை முறை பார்த்தாலும் சலிக்கா தேர்ந்தெடுக்கப்பட்ட சில திரைப்படங்கள், குடும்ப சகிதமாய் எடுத்த ஒளிப்படங்கள், நம் வீட்டு வீடியோ கலாட்டாக்கள், திருமண சிடிக்கள், இன்னபிற நம் முக்கிய கோப்புகள் இவற்றையும் பத்திரமாய் பாதுகாக்க வேண்டியது நம் பொறுப்பு.

வீடுகளில் Network Attached Hard Disk-கள் இப்போது பிரபலம். ஒரு முறை இந்த ஹார்ட்டிஸ்கை உங்கள் வீட்டு நெட்வொர்க்கில் இணைத்து விட்டு விட்டால் போதும் அதை அதன் பாட்டுக்கு ஒரு மூலையில் வைத்துவிடலாம்.No shaking nothing. மேற்சொன்ன உங்கள் முக்கிய கோப்புகளை தைரியமாய் அதில் சேமித்து வைப்பதோடல்லாமல் உங்கள் வீட்டு பல கணிணிகளையும், மடிக்கணிணிகளையும் கூட அதில் முழுசாய் Backup செய்து வைத்துக் கொள்ள முடியும். இதன் இன்னொரு விஷேசம் உங்கள் வீட்டு நெட்வொர்க் இணையத்தோடு இணைக்கப்பட்டிருந்தால் உங்கள் அந்த Network Attached Hard Disk-க்கை உலகின் எந்த மூலையிலிருந்தும் உங்களால எட்டமுடியும். உங்கள் கணிணி ஓடிக் கொண்டிருக்க வேண்டுமென்ற அவசியமில்லை. அந்த Hard Disk மட்டும் ஓடிக் கொண்டிருந்தால் போதுமானது. இதற்கு Mionet போன்ற மென்பொருள்கள் உதவலாம்.

இல்லை CD தான் DVD தான் உங்கள் கட்சி எனில் உங்கள் கோப்புகளை அவ்வப்போது அவற்றில் பத்திரமாய் பேக்அப் செய்து வைத்துக்கொள்ளுங்கள்.எப்போவாவது உங்கள் சிடியோ அல்லது டிவிடியோ மக்கர் பண்ணினால் கீழ்கண்ட மென்பொருள்களை முயன்று பாருங்கள். பொதுவாக ஸ்கிராச்சுகள்(scratches) உள்ள CD, DVD, HD DVD, Blu-Ray தட்டுகள் ரொம்பவே தொல்லைகொடுக்கும். முடியற வரை படித்து, முடியாததை ஸ்கிப் செய்து, மீண்டும் முடிந்ததை படிக்க இந்த மாதிரியான CD Recovery மென்பொருள்கள் உதவுகின்றன.

Roadkil's Unstoppable Copier
http://www.roadkil.net/program.php?ProgramID=29

CD Recovery Toolbox
http://www.oemailrecovery.com/cd_recovery.html

ரமணிச்சந்திரன் புதினம் "வெண்ணிலவு சுடுவதென்ன" இங்கே தமிழில் சிறு மென் புத்தகமாக. Ramani Chandran Novel Vennilavu Suduvathenna in Tamil pdf ebook Download. Right click and Save.Download


Email PostDownload this post as PDF

Friday, August 01, 2008

குடும்பத்தினிற்கோர் தளம் அமைப்போம்

அப்பாவுக்கு டிரான்ஸ்பர் வந்ததால் பாதியிலேயே விட்டுப்போன பால்ய நண்பன் சுதாகர் மற்றும் பத்துபடிக்கும் போது அருமையாய் அறிவியல் சொல்லிக்கொடுத்து அசத்திய "கஞ்சா" வாத்தியார், கணக்கோடு கொஞ்சம் வாழ்க்கை கணக்கையும் சொல்லிக்கொடுத்த ராஜாகிருஷ்ணன் சார், ஒரு நண்பன் போல அளவளாவி மின்னணுவியலை பயிற்றுவித்த ஜனார்த்தனன் சார், ஹார்டுவேர் கற்றுக் கொடுத்து வாழ்விலும் தூக்கிவிட்ட என் சக்கரவர்த்தி சார், ஹாயாக பைக்கில் கதீட்ரல் ரோடு, ஸ்டெர்லிங்ரோடு, மவுண்ட்ரோடு என என்னுடன் சுற்றிய கல்லூரி நண்பன் வெங்கட் - இவர்களிடமெல்லாம் இன்னொரு முறைகூட பேச ஆசை.உலகம் சிறியதாகிப்போயினும் இதுபோல சிலவற்றில் அது இன்னும் மான்ஸ்டர் தான். குச்சி ஐஸிலிருந்து அணுகுண்டுவரைக்கும் தயாரிக்க வழிசொல்லும் கூகிள் சுதாகரையோ வெங்கட்டையோ கண்டுபிடிக்க வழி சொல்ல மாட்டேன் என்கின்றான்.

மற்றவர்களாவது என்னை கண்டுபிடிக்க ஒரு எளிய வழி செய்யவேண்டுமென எனக்கு தோன்றியது. ஒரு வலைப்பக்கத்தை தொடங்கினேன். அதில் என் பெயர்,படித்த பள்ளி கல்லூரி பெயர், பிறந்த ஊர் , வளர்ந்த ஊர், வேலைசெய்த இடங்கள், நிறுவனங்கள் இன்னபிற என்னைபற்றிய பல கீ சொற்களையும் எழுதி என் மின்னஞ்சலையும் கைப்பேசி எண்ணையும் அதில் போட்டு வைத்தேன். கடைசியில் அது என்னமோ என் குடும்ப வலைத்தளம் போல் காட்சியளித்தது. கூகிள் தான் உஷார் பார்ட்டி ஆயிட்டுதே. ஒரு டிரில்லியன் பக்கங்களை அல்லவா படித்து வைத்திருக்கின்றான்.என் பக்கத்தையும் படித்திருக்கின்றான் போலும். சில மாதங்களுக்கு முன் சும்மாவாச்சும் சோதனைசெய்ய என் பெயரையும் என் ஊர் பெயரையும் சேர்த்து கூகிளில் டைப்பினேன். என்ன ஆச்சரியம் நான் உருவாக்கியிருந்த என் குடும்ப வலைத்தளம் முதல் பக்கத்தில் முதல் வரியிலேயே வந்தது.

போன வாரத்தில் ஒரு நாள் திடீரென ஒரு போன் கால்.
"ஹலோ என்னை யாருன்னு தெரியுதா?" ஒரு வித்தியாசமான குரல்.
ஒன்றும் புரியவில்லை "தெரியல்லையே" என்றேன் தயக்கமாக.
"நாயே...மறந்துட்டியா.நான் வெங்கட்டுடா" என்றான். எனக்கு ஆச்சர்யம் தாங்கவில்லை.
"எப்படிடா என் நம்பரை கண்டுபிடிச்சே" என்றேன் நான்.
"அதுதான் கூகிள் கொட்டுதே" என்றான்
பழைய கல்லூரி நினைவுகளில் மூழ்கினோம்.மவுண்ட் ரோட்டில் டூவீலரில் பறந்த சுடிதாரை விரட்டி கடைசியில் வேகமிகுதியால் ஜெமினி பால திருப்பத்தில் விழுந்ததை இன்று நினைத்தாலும் சிரிப்பு வருகின்றது. சிரித்தோம். லோலோன்னு சுத்திய காலங்கள் அவை.
"மணிமாலா எப்படிடா இருக்கின்றாள்" என்றேன்.
"ஆங்...பொண்டாட்டி உதைப்பா" என்றான்.

டிஸ்கி:
இது மாதிரியான குடும்ப வலைத்தளங்களை உருவாக்கும் போது கொஞ்சம் கவனமாய் இருங்கள். அளவுக்கு அதிகமான தனிநபர் தகவல்களை அதில் போடுவதை தவிர்ப்பது நல்லது. அனாவசிய போட்டோக்களையும் தவிர்க்கலாம். அதிகபட்சமாய் சில சமயம் உங்கள் குடும்பம் பற்றிய நல்லது கெட்டதுகளை கூட official ஆக இணையம் வழி நண்பர்கள் அனைவருக்கும் தெரிவிக்கலாம். நிலவரங்களை சொல்லலாம். டைரக்சன்கள் கொடுக்கலாம்.இன்ன பிற செய்யலாம்.(அதென்ன டிஸ்கி என்கின்றீர்களா.Disclaimer-ஐ தான் நம்மாட்கள் சுருக்கமாக டிஸ்கி என்கின்றார்கள்.)

ஜான் பன்யன் "மோட்ச பிரயாணம்" இங்கே தமிழில் சிறு மென் புத்தகமாக. Tamil Motcha Pirayaanam John Bunyan The Pilgrim's Progress pdf ebook Download. Right click and Save.Download


Email PostDownload this post as PDF
Related Posts Plugin for WordPress, Blogger...

சமீபத்திய பின்னூட்டங்கள்